Il film «Heldin» tracta da la tgirunza Floria Lind. Giugada vegn ella da l'actura tudestga Leonie Benesch. I va per in servetsch tard en in ospital sin la staziun da chirurgia. Durant l'entir film accumpagn'ins la tgirunza Floria tar ses servetsch. Al principi dal film ves'ins, co ch'ella arriva a l'ospital, sa mida e surpiglia il servetsch da la tgirunza avant. Suenter seguan ins Floria da pazienta a pazient. Ella mida pez, mesira fevra, dat medicaments cunter il mal, mesira il puls, piglia giu telefons e bler auter dapli. En il decurs dal film vegn latiers adina dapli lavur che la tgirunza Floria ha da far. Ella na vegn a tscherts puncts strusch pli suenter cun tut la lavur.
Quant datiers è quest film a la realitad?
En differentas recensiuns da persunas che vegnan da quella professiun vegn scrit che las lavurs che la tgirunza fa en il film sajan realisticas. Ed era bleras da las situaziuns e las emoziuns mussadas en il film enconuschan era tgirunzas e tgirunzs en la realitad. I sajan singuls muments en il film, nua cha las situaziuns sajan in pau surfatgas.
Or da l'archiv: