Canortas d'uffants - Co vegnan uffants protegids da violenza?

Blers geniturs dovran agid tar la tgira dals agens uffants per ch'els pon cumbinar famiglia e professiun. Ils ins han tat e tatta che guardan dals pitschens, durant che mamma e bab lavuran. Auters dependan d'ina plazza en ina canorta. Da surlaschar la tgira da l'uffant ad insatgi auter, dovra confidenza. Perquai tuni sc'in dischariel – in nausch siemi – per mintga genitur, sch'insatgi ch'avess da guardar da l'agen uffant, fa dal mal a quel. 

Tristamain datti tals cas. E sch'els capitan en canortas, alura bittan els per il solit undas. Sco il cas d'in collavuratur da canorta ch'è vegnì sentenzià avant curt da la dretgira regiunala da Turitg pervia d'acts sexuals cun in uffant e pervia d'avair fatg fotografias d'uffants bluts a la plazza da lavur. Critic tar quest cas è en spezial era che l'um ha pudì cumenzar ina nova lavur en in'autra canorta suenter ch'igl è vegnì disditg ad el la plazza.

Pudess in tal cas era capitar en il Grischun?

Pudessi era capitar en il Grischun ch'ina persuna ch'è en ina procedura penala (Strafverfahren) – en in context da violenza sexuala – po lavurar vinavant cun uffants? Ch'i dat dapi il schaner 2023 in nov sistem dal register penal pudess gidar ad evitar insatge sumegliant. En il nov sistem vegnan numnadamain registradas sper sentenzias era process pendents u sumegliant.

Quest sistem da register penal fa era part dal process da recrutaziun da las canortas en il Grischun. Avant che las canortas pon engaschar ina nova collavuratura u in nov collavuratur ston ellas inditgar la candidata u il candidat a l'Uffizi dal servetsch social dal Grischun. Lez controllescha cun agid dal sistem sch'i dat sentenzias u process pendents u sumegliant che fissan in motiv che la persuna na po betg lavurar cun uffants. Damai che quai è in sistem naziunal èn nudadas ils delicts ch'èn vegnids cumiss en l'entira Svizra. Tar candidaturas da l'exteriur vegn plinavant dumandà per in extract dal register penal dal pajais da derivanza. L'Uffizi dal servetsch social dal Grischun – che fa quella controlla en sia funcziun sco autoritad da surveglianza da las canortas – dat lura in resun a la canorta sche la persuna è adattada u betg. E quella controlla vegn silsuenter repetida mintg'onn cun l'entir persunal da tuttas canortas en il Grischun.

Co vegnan uffants da canorta schurmegiads da surpassaments?

Tge pon educaturs ed educaturas da canortas far – e tge betg? Èsi en urden da dar bitschs als uffants? Cura stoni esser manaivel – e quant manaivel – forsa per consolar e cura dovri distanza? Persunas che lavuran en canortas ston avair in bun sensori. Perquai saja il sensibilisar ina basa impurtanta per schurmegiar uffants da violaziuns di Alice Bisaz, la manadra da la fundaziun Tgira d'uffants Engiadin'Ota , ch'è responsabla per las tschintg canortas d'uffants a Puntraschigna, Samedan, San Murezzan, Silvaplauna e Zuoz.

Per che tuttas collavuraturas e tut ils collavuraturs hajan la medema situaziun da partenza e discurrian dal medem datti tar las canortas da l'Engiadin'Ota in «codex da cumportament» en furma d'in document cumplessiv. Ins possia definir mesiras preventivas a moda concepziunala en scrit, ma i restia in toc palpiri. Perquai vali dad adina puspè prender enta maun quest concept e da discutar e surlavurar el en il rom da sesidas da team.

Ina da las mesiras concretas dal concept è il principi da quatter egls – ch'ins infurmescha l'in l'autra sch'ins va per exempel a midar ad in uffant il pez. Midar il pez pon educaturas ed educaturs da las canortas da l'Engiadin'Ota dal reminent pir suenter in tschert temp d'introducziun. L'uffant sto avair bajegià si la confidenza e la collavuratura resp. il collavuratur ston esser s'endisà. Sch'insatgi mida il pez stoppia la porta tar la stanza adina esser averta ina sfessa. Tant la sfera intima da l'uffant sto esser protegida, sco era la segiertad envers l'uffant ed il creschì sto esser dada. Las collavuraturas ed ils collavuraturs sappian era ch'i possia adina esser ch'insatgi vegnia vitiers. I saja mai insatgi cumplettamain sulet.

Entras il «codex da cumportament» enconuschan tuts e tuttas las reglas. Alura vai persuenter d'esser in bun exempel e da viver avant quai ch'ins ha fatg giu. Ed era da tematisar sch'insatgi fa insatge ch'el u ella na dastga betg far.

Er ils geniturs giogan ina rolla impurtanta tar la prevenziun da surpassaments. Els survegnan dal reminent er il codex tar l'entrada da l'uffant en la canorta, per ch'els sajan infurmads. Ins saja mintga di en barat cun ils geniturs respectiv cun las persunas cun represchentanza legala, manegia Alice Bisaz. Ins sa baratta davart da chaussas e situaziuns che preoccupan, per ch'ins possia interpretar las reacziuns da l'uffant sch'igl è insatge spezial. Las educaturas ed ils educaturs enconuschan bain l'uffant e san co ch'el è en la canorta, ils geniturs san co l'uffant sa cumporta a chasa. E sch'ins percorscha che l'uffant è tuttenina auter, pon ins far attent l'in l'auter. La protecziun d'uffants en canortas na saja en mintga cas betg fatga cun metter tut sin palpiri, explitgescha Alice Bisaz, impurtant saja da star vidlonder cuntinuadamain e d'observar minuzius per schurmegiar ils pli giuvens.

E tgi sa, forsa dat quest artitgel in impuls per dumandar suenter en l'atgna canorta, tge mesiras ch'i dat per schurmegiar ils uffants da surpassaments.

Or da l'archiv: