San Murezzan
- Il suveran da San Murezzan accepta la nova lescha da turissem. 73% da las votantas e votants han mess in Gea en l'urna. Questa lescha è la basa per la fundaziun e lavur futura da l'organisaziun turistica e necessaria cunquai che la vischnanca aveva decidì da bandunar la destinaziun turistica da l'Engiadin'Ota per l'onn 2024. La nova organisaziun cun num «San Murezzan Turissem» duai esser ina societad d'aczias cun la vischnanca sco unica acziunaria. La finamira è da posiziunar San Murezzan sco lieu d'auta qualitad, da prolungar las stagiuns e da regiuvinar la structura da giasts.
- Cun 82% ha la populaziun approvà in credit da construcziun per il nov edifizi d’abitar Du Lac (post da construcziun B) da bun 20 milliuns francs. Il nov edifizi duai porscher 18 enfin 36 abitaziuns per indigens.
- Il credit per la construcziun nova da l’infrastructura Campadi San Murezzan per passa 3,8 milliuns francs è vegnì approvà cun 80%.
- La populaziun ha er approvà cun 87% Gea ina revisiun da la planisaziun locala dal lai «Nair Pitschen». Cun quella midada duai esser pussibel da construir in segund lai da fermada en il territori da skis Corviglia/Marguns. Cun in Gea a la revisiun parziala da la planisaziun locala dat il suveran era il dretg da construcziun a las pendicularas, che vegnan a construir il lai.
La participaziun a la votaziun a San Murezzan munta a var 45%.
Cuira
- La chapitala grischuna sustegna in project per il provediment cun chalur e fradaglia. Il suveran ha decis qua cun var 61% Gea. I va per in project da totalmain 80 milliuns francs, repartì sur 12 onns. 60 milliuns valan sco credit e per auzar il chapital da dotaziun, ils ulteriurs 20 milliuns valan sco pussaivla garanzia per in credit da 160 milliuns entras in institut da credit.
- Cun 63% Gea ha il suveran er approvà la construcziun d'ina nova Stadthalle. Concret dat la populaziun il consentiment ad ina contribuziun annuala da 560'000 francs che va a la Stadthalle Chur AG. Ils daners or da la contribuziun annuala èn per pajar tschains ed amortisaziuns. Las lavurs duain cumenzar il matg 2024. Pertge il pli tard il 2025 vegn la veglia Stadthalle stgarpada giu, lezza sto far plazza a la staziun a val Brambrüesch.
La participaziun a la votaziun a Cuira èra tar bunamain 35%.
Flem
- En la vischnanca da Flem duai vegnir construì in nov lieu da rimnada ed ina centrala d'energia. Cun la revisiun parziala dal plan da zonas e dal plan general d'avertura en il conturn da la deponia Vallorca vegnan uss stgaffidas las premissas perquai. 93% da las persunas ch'èn idas a votar han mess in Gea en l'urna. La nova centrala duai furnir chalira per ils quartiers Tull, Pleuncas, Caglims, Camaruts e Vallorca. Quai cun agid da la funtauna d'aua da carst en il tunnel da sviament Flem.
- La populaziun da Flem ha decidì ina revisiun parziala da la planisaziun locala. 88% da las votantas e votants han mess in Gea en l'urna. Cun quella midada duai l'entira parcella 4002 vegnir en la «zona da coc II» da la vischnanca. Actualmain sa chatta quella parcella en duas zonas da bajegiar. La vischnanca aveva cumprà la parcella il 2012 explicitamain per construir spazi d'abitar pajabel per indigens.
La participaziun a la votaziun munta a var 36%.
Panaduz
- Panaduz ha confermà la decisiun da la suprastanza da cumprar la chasa a la Dorfstrasse 3. Quella chasa custa bun 1,3 milliuns francs. La votaziun è stada stgarsa cun 354 vuschs Gea (51%) cunter 342 vuschs cunter. Uschia cumpra la vischnanca giu la chasa da la plaiv. Previs èsi da metter a disposiziun l'areal e la chasa als interess publics tranter auter era per procurar per dapli spazi liber en vischnanca.
Val Müstair
- En Val Müstair ha la populaziun decidì in scumond absolut per fieus artifizials, rachetas e petardas. Cun 64% Gea han ins decidì da midar l'artitgel 10 da la lescha da polizia. Fin uss eri pussaivel da far fieus artifizials u laschar sgular rachetas cun lubientscha da la vischnanca u en general il prim d'avust e da Silvester.
- Plinavant ha la populaziun approvà la nova lescha davart la protecziun da la populaziun da la vischnanca da Val Müstair. 68% da las persunas han mess in Gea en l'urna. La lescha duai reglar las cumpetenzas e las incumbensas dals organs communals, sco era la finanziaziun da las expensas colliadas cun la protecziun da la populaziun.
La participaziun a la votaziun munta a var 27%.
Vaz Sut
- Cun 82% Gea ha il suveran da Vaz Sut decidì ina revisiun totala da la constituziun communala. La revisiun totala da la constituziun communala è necessaria, perquai che dretg surordinà è sa midà. Cun la revisiun totala vegn per exempel il temp d'uffizi per il president communal limità sin maximalmain sis periodas à trais onns, pia total 18 onns.
La participaziun a la votaziun munta a var 22%.
Grono
- Il suveran da Grono vul cleramain nizzegiar il termin da scadenza per la concessiun da l'ovra Calancasca e cunquai far diever da pigliar enavos en possess communal e chantunal l'ovra idraulica. 99% da las votantas e votants han mess in Gea en l'urna. En tschintg onns scada la concessiun per ils implants da l'ovra idroelectrica Calancasca. Per pudair nizzegiar il dretg da scadenza sto quai vegnir communitgà a la Calancasca SA fin als 29 da december 2023. Plinavant dovri in credit general da 500'000 francs, partì si tranter il chantun Grischun (46,6%) e las quatter vischnancas Buseno (19,1%), Castaneda (16,9%), Grono (14%) e Roveredo (3,4%). Cun la decisiun dad oz vegn la vischnanca da Grono a contribuir sia cumpart da 70'000 francs.
