Per Carmelia Maissen, la manadra dal Departament d'infrastructura, energia e mobilitad, è la cleradad dal resultat surprendenta. Ad ella croda en egl che tuts han sustegnì il project cun grondas maioritads, quai saja in ferm signal per rinforzar il Grischun sco lieu da furmaziun.
Quest project na saja betg mo in bajetg, mabain ina mesira per tegnair en il chantun quels che vulan studegiar ed er attrair persunas d’ordaifer. Uschia haja la populaziun ditg Gea er ad ina talmain gronda summa perquai ch'i saja ina investiziun en la proxima generaziun. Per ella èsi ina gronda motivaziun da savair che la populaziun sustegn il project.
Grischun orientà vers l'avegnir
Per Jürg Kappeler, il president da l’uniun da promoturs FHGR, èsi in grondius resultat. Che 83% da la populaziun ha ditg Gea a la pli gronda investiziun en la construcziun auta ch’il chantun ha insacura dumandà, saja in grond levgiament per ils responsabels.
Il campus duaja procurar per persunas dal fatg e dar in stausch a la economia e crear potenzial per las regiuns. Il project haja uschia ina gronda muntada per il svilup dal Grischun orientà vers l'avegnir. Uss haja la populaziun delegà ina gronda responsabladad che la FHGR stoppia mussar che la fidanza è giustifitgada. Ma quai sustegn dettia er motivaziun.
Tenor Kappeler mussa il resultat ch’ils Grischuns e las Grischunas stattan ensemen e dattan or blers raps per in pass en il futur e mussan a la regenza ch’ins possia er prender a maun projects gronds.
Credit da 151 milliuns francs per il nov campus da la Scola auta spezialisada
GEA 83.08%, Na 16.92%Resultat
Il resultat è dapertut cler, schizunt senza cuntravusch vegn il credit atras a Buseno, Calanca e Rossa. Il pli stretg è la decisiun stada a Rongellen. Cun be 57,89% Gea è quai l'unica vischnanca cun la cumpart da Gea sut 60%. Sa participads èn passa 26% dals votants e votantas en Grischun.
Per tge vai?
Ils ultims onns èn il dumber da studentas e students, sco er il volumen da perscrutaziun creschids cuntinuadamain a la FHGR. Perquai ha la scola stuì fittar adina dapli stanzas ordaifer l'atgna scola. Oz ha la Scola auta spezialisada dal Grischun total tschintg lieus nua ch'i vegn instruì e lavurà en la citad da Cuira. En quests lieus manca dentant il plaz per pudair extender e sviluppar la scola. Per pussibilitar il svilup a la scola ha il Cussegl grond decidì il 2018 da realisar il center per la FHGR a la Pulvermühle ed ha incumbensà la regenza da scriver ora il project.
Da realisar il center da la Scola auta spezialisada saja per il chantun da gronda muntada, quai or da vista politica da furmaziun, perscrutaziun ed innovaziun. La mancanza da persunal dal fatg, en spezial en disciplinas tecnicas e da las scienzas natiralas, engrevgeschia ad interpresas da sa sviluppar e crescher. En quest conturn saja la FHGR in impurtant actur, scriva la regenza. Quai per scolar persunas e promover il medem mument l'economia grischuna.
Il Cussegl grond ha deliberà il credit senza cuntravusch l'october passà. En tut planisescha il chantun investiziuns da 178 milliuns francs (151 milliuns dal chantun e 27 milliuns da la Confederaziun). Quai è il pli char project ch'igl ha dà en il Grischun fin ussa.
