Critica encunter il project per l'energia persistenta era vegnida avant la votaziun da la Partida populara svizra. Per il president da la partida da Cuira, Mario Cortesi, èsi in ristg da bandunar l'energia fossila ed ils custs sajan memia auts. Uss saja decis e l'IBC stoppia investir en quest project, senza pudair far auters projects, perquai ch'i hajan lià tut ils daners en quel.
Il suveran ha cleramain ditg Gea al credit da 60 milliuns francs per la rait da chalur a distanza da l'IBC, cun ina garanzia supplementara per 20 milliuns francs. Quai cun passa 60% da las vuschs. Anc in zic meglier è il resultat stà tar la decisiun per ina contribuziun annuala per la nova Stadthalle. La participaziun è stada tar bunamain 35%.
Cuira: Contribuziun annuala per la nova Stadthalle
Resultat
Cuira: Credit da 60 milliuns francs per l'IBC
Resultat
Per tge vai?
Stadthalle
La nova Stadthalle vegn a l'ur da la citad da Cuira, sper ils indrizs da sport, sin l'areal da l'Obere Au. Las lavurs duain cumenzar il matg 2024. En tut duai quest project custar 43 milliuns, finanzià entras la Stadthalle Chur AG. La nova halla possia cuvrir ils custs da manaschi sezza, scriva la citad. Quintian ins dentant vitiers amortisaziuns e tschains, alura dettia ina perdita. Perquai possia la nova Stadthalle be vegnida realisada cun ina contribuziun annuala da 560'000 francs da la citad.
IBC
Il provedider d'energia e d'aua da Cuira, l'IBC, ha mess la finamira da furnir l'energia per Cuira fin il 2040 neutral al clima. Pia senza producir dapli CO2. Per cuntanscher questa finamira vul l'IBC bajegiar ora la rait da chalur a distanza e nizzegiar aua sutterrana. La citad da Cuira vul sustegnair il project da l'IBC («Masterplan Energia Cuira 2040») cun totalmain 80 milliuns francs – repartì sur 12 onns. 60 milliuns sco credit e per auzar il chapital da dotaziun, ils ulteriurs 20 milliuns sco pussaivla garanzia per in credit da 160 milliuns entras ina banca.