Tar l’elecziun per remplazzar il cusseglier dals chantuns socialdemocratic da Son Gagl Paul Rechsteiner, n'han naginas da las quatter candidatas cuntanschì la maioritad absoluta. Cleramain las bleras vuschs ha fatg Esther Friedli da la PPS, suandà da la liberala Susanne Vincenz-Stauffacher.
La repartiziun da las vuschs
- Esther Friedli (PPS) – 55'660 vuschs
- Susanne Vincenz-Stauffacher (PLD) – 26'938 vuschs
- Barbara Gysi (PS) – 22'167 vuschs
- Franziska Ryser (Verds) – 21'791 vuschs
La participaziun è stada tar 40,15%. Tgi che daventa successur respectiv successura da Paul Rechsteiner vegn decidì cun in segund scrutini ils 30 d’avrigl.
Appenzell Dadora: Katrin Alder fa il segund meglier resultat
Suenter sis onns ha il chantun Appenzell Dadora puspè ina dunna en la regenza. Katrin Alder da la PLD è vegnida elegida cun il segund meglier resultat. Ed ella ha fatg mo 25 vuschs pli pauc ch'il reelegì cun il meglier resultat, Alfred Stricker. Er ils ulteriurs commembers da la regenza èn vegnids reelegids.
In cumbat electoral n’hai dentant betg dà. Per il sez da cusseglier guvernativ partent Paul Signer – era sia collega da partida Katrin Alder la suletta candidata.
Lucerna regulescha Airbnb
La citad limitescha fermamain la pussaivladad da dar a fit per in curt temp abitaziuns, sco Airbnb. Las votantas ed ils votants da Lucerna han approvà in’iniziativa, che lubescha mo pli d’affittar per maximal anc 90 dis ad onn. La cuntraproposta main severa dal cussegl da la citad ha il suveran refusà.
Sumegliantas reglas enconuschan gia ils chantuns Genevra e Vad. E la citad da Berna ha era limità il diever d'abitaziuns sco alloschis da vacanzas. Plinavant paja Airbnb en plirs chantuns taxas turisticas – dasper Lucerna èn quai Turitg, Zug, Genevra ed ils dus mezs chantuns da Basilea.
Berna: Dus Geas per sviaments dispitaivels
Il chantun da Berna po realisar duas vias ad Aarwangen ed en l’Emmental. Suenter in cumbat da votaziun cun bleras emoziuns han ils votants e las votantas da Berna approvà ils dus projects. En tut investescha il chantun passa 400 milliuns francs en ils dus sviaments.
Genevra schanegia gronds acziunaris
Persunas cun bleras aczias d’ina firma na ston betg pajar dapli impostas en l’avegnir. L’iniziativa da la sanestra che pretendeva quai han ils da Genevra refusà cun 59,2% da las vuschs.
Ils iniziants vulevan «Stritgar ils privilegis da taglia per acziunaris gronds». Acziunaris cun ina cumpart da pli che 10% vid ina societad anonima u ina GmbH – avessan en l’avegnir stuì pajar ina taglia da 100% sin lur dividendas, enstagl da 60 u 70%. En mira eran ils 1’600 acziunaris ed acziunarias grondas dal chantun.
Pajar damain taglia a Basilea
Tgi che abita en il chantun Basilea-Citad ha en l’avegnir da pajar pli pauc impostas. 84,4% da las votantas e dals votants han ditg Gea da midar la lescha. Dasper levgiaments per las famiglias èn era planisadas reducziuns tar las taglias sin las entradas e sin la facultad.
Silvania: neutral al clima senza termin fix
Las regenzas ed ils parlaments dals chantuns Sursilvania e Sutsilvania eran da l’avis – las duas iniziativas dal clima na fan betg da basegn. Ed ils votants e las votantas èn suandadas, e han refusà da francar in termin per daventar neutral al clima.
La Sursilvania ha refusà l'iniziativa che pretendeva d'esser neutral al clima gia il 2040, cun 73% Na. Uschia resta la Sursilvania tar la finamira da 2048, sco previs en il program da mesiras chantunal.
Il chantun Sutsilvania ha era refusà l’iniziativa, cun 74% Na. Approvà ha il suveran dentant cun 61% da las vuschs ina cuntraproposta, che na cuntegn nagin termin per cuntanscher la neutralitad al clima.