Strusch abitaziuns d'affittar ed ina quota da segundas abitaziuns da 70 pertschient: sche la vischnanca da Flem vul glieud ch'abitescha durant l'entir onn en vischnanca, sto ella reagir. La vischnanca haja perquai prendì si contact cun la possessura da la parcella 784 en il quartier da Plaids. Ed ins haja pudì concluder in contract da cumpra, quai cun la resalva ch’il suveran approvescha quella cumpra a l'urna, uschia Christoph Schmidt, il president communal da Flem.
Per 45 abitaziuns novas
Realisar quella finamira è dentant cumbinà cun investiziuns. La vischnanca po cumprar la parcella 784 per in pretsch da 4'073'300 francs. La suprastanza è ida a la tschertga da nov terren da bajegiar. In project è gia sin buna via: Il project «Gion e Flurina» sin la parcella 4002 a Casa d’Uaul vegn dentant realisà. Quest onn cumenzan las lavurs per la surbajegiada per indigens cun 22 abitaziuns en duas chasas. Per pudair bajegiar ulteriur spazi pajabel per indigens dovra la vischnanca percunter giaschom. A Flem Vitg, a l’entrada dal quartier Plaids, datiers da la chasa d'attempads e da tgira, sa porscha ussa la chaschun: La persuna privata è pronta da vender sia parcella ordvart adattada. Il pretsch da 1350 francs il meter quadrat per il prà è sin livel bass da la fiera d’immobiglias da Flem.
Questa parcella è per nus ina super chaschun.
La surfatscha en la zona da bajegiar ha in grondezza da 3018 m2. Tenor il president communal da Flem giajan ins da quai anora, ch’i haja spazi per rodund 45 abitaziuns. Ins haja gia vesì skizzas d’auters projects per questa parcella. Finanziar l’investiziun veglia la vischnanca cun las entradas da las taxas da cumpensaziun che proprietaris pajan che vulan laschar a fit, sut tschertas cundiziuns, emprimas abitaziuns sco abitaziuns da vacanzas, declera Christoph Schmidt.
Segirar Bargis per purschida turistica
Sper quella fatschenta da stgaffir abitaziuns per indigens han votantas e votants il davos pled en chapitel pertutgant la cumpra da l’ustaria a l’entrada da la Val Bargis. Gia il december passà ha la suprastanza suttascrit il contract cun ils proprietaris actuals, quai cun la resalva che la cuminanza a l’urna concedia il credit. La vischnanca po cumprar questa immobiglia per in pretsch da 1,93 milliuns francs. «Qua tras ha la vischnanca la garanzia che l’ustaria resta vinavant averta e ch’ella stat a disposiziun da stad e d’enviern al turissem», motivescha la suprastanza sia finamira.
La finala ha il suveran da Flem da prender posiziun anc tar il project da renovar il santeri e construir in ascensur. La suprastanza dumonda ina summa da 1,4 milliuns francs per la renovaziun cumplessiva dal santeri ed ina tala da 540'000 francs per construir l’ascensur.
Il quart project da la votaziun a l’urna pertutga la revisiun parziala da la planisaziun locala. Suenter ch’il pievel da Flem aveva refusà il zercladur passà la proposta da la suprastanza, ha quella chattà ina via che lubescha da mantegnair ils ierts e conturns da las chasas. Tenor la nova proposta vegn quai terren exclus da la mobilisaziun obligatorica tenor legislaziun federala e chantunala.
Ils 9 da favrer decidan anc ulteiuras vischnancas davart projects communals:
