La vischnanca da Schluein n’è betg cuntenta cun la situaziun actuala en il provediment da sanadad en Surselva. La situaziun finanziala da l'ospital e la decisiun da la Sana Surselva che las vischnancas duajan surprender en l'avegnir nunlimitadamain ils deficits da l'ospital na vul la radunanza communala betg sustegnair. Ella suonda uschia cun 30 envers 13 vuschs la proposta da la suprastanza communala ch'aveva gia ditg il december 2023 ch’ella veglia extrar da la Sana Surselva sin la fin dal 2025.
La vischnanca resta dentant era suenter quest termin obligada, tenor la lescha per promover la tgira da persunas malsaunas, da s'organisar en moda cunvegnenta en la regiun da provediment da sanadad. La suprastanza communala vul s’engaschar per in'organisaziun da sanadad cunvegnenta e progressiva che cuntegn models da contribuziun previsibels. Quels duajan dar impuls per in'ospital regiunal che saja economicamain effizient. Uschia pudess la vischnanca tenor l'opiniun da la suprastanza en l'avegnir puspè s'associar a la Sana Surselva. Quai naturalmain suenter ina nova votaziun da la radunanza communala.
Na era a la Reit da Sanadad Surselva
La fin favrer 2024 ha la Sana Surselva fundà la nova «Reit da sanadad Surselva SA». Quella organisaziun duai surpigliar las organisaziuns da sanadad actualas sco il Spital regiunal, las chasas da vegls ed attempads e las organisaziuns da spitex e manar quellas a moda centralisada. Encunter la decisiun che las vischnancas pertutgadas duajan era daventar commembras e che las vischnancas hajan medem sco tar l'ospital da surpigliar garanzias da deficits nunlimitadas è la suprastanza da Schluein sa dustada. La radunanza communala ha uss confermà quella decisiun ed approvà la proposta cun 36 envers 8 vuschs da betg participar il mument a la rait. Tut tenor svilup da l’organisaziun saja tenor l’infurmaziun da la suprastanza communala era pussaivel pli tard dad entrar en la rait da sanadad.
Elecziuns senza tensiun
La perioda d’uffizi da las autoritads communalas a Schluein cuzza dus onns. Tenor la constituziun communala vegnan en in onn d'elecziun il president communal ed in commember da suprastanza ed en in auter onn trais commembers da suprastanza elegids. Quest onn hai dà naginas uschia ch’il president communal Ralf C. Schlaepfer ed il suprastant Corsin Bearth èn vegnids elegids senza discussiun.
Quint annual 2023 equilibrà
Il quint current 2023 serra tar entradas ed expensas da 3,5 milliuns francs cun in pitschen deficit da 3‘600 francs. Amortisaziuns èn vegnidas fatgas en la summa da 200'000 francs. L'agen chapital da Schluein munta a bun 20 milliuns francs. Il quint d’investiziun serra cun entradas da 620'000 francs ed expensas da 880'000 francs .