Otg instituziuns da sanadad ed 11 vischnancas politicas da la Surselva han fundà oz la «Reit da sanadad Surselva SA» a Trun. Las acziunarias han uschia mess il fundament per l'interpresa che duai tenor statuts colliar las instituziuns da sanadad, sviluppar novas furmas da collavuraziun e procurar per in provediment da sanadad d'auta qualitad en la Surselva.
Jau spetg che la rait da sanadad procura per ina sminuziun dals custs da sanadad.
Sut la batgetta da la corporaziun da vischnancas SanaSurselva han las instituziuns e las vischnancas elavurà durant passa trais onns il fundament per las structuras da la rait da sanadad, l'interpresa cun domicil da la fatschenta a Glion.
Quai è in fitg fitg impurtant mument, betg mo per mai, mabain igl è in impurtant mument per nossa regiun, la Surselva.
Entaifer il process da svilup han quatter da 12 instituziuns da sanadad e quatter da 15 vischnancas desistì d'ina participaziun. Concret vul quai dir che las instituziuns Puntreis, Da Casa Val Lumnezia, la Claustra da las Dominicanas e la Spitex Foppa na tutgan betg tar l'acziunariat. Plinavant na fan las vischnancas da Falera, Glion, Laax e Schluein betg part da la nova societad d'aczias.
Enfin l'onn 2027 operativa
La presidenta da la SanaSurselva, Martina Beeli, ha èn il passà adina puspè discurrì d'in spusalizi, cura ch'i gieva per la fundaziun da la «Reit da sanadad SA». Quai che suonda suenter il di dad oz, maina sche tut va tenor plan a las nozzas l'entschatta 2027. I munta d'integrar ils manaschis che sa participeschan a las structuras da la nova interpresa.
Nus vegnin a promover il svilup uschia, che nus pudain surdar l'entschatta 2027 la gestiun strategica ed operativa a la «Reit da sanadad Surselva SA».
Cun la radunanza constitutiva a Trun han las acziunarias elegì il cussegl d'administraziun cun otg commembers. Quai è Manfred Manser sco president – e sco ulteriuras commembras Martina Beeli, Sarina Caduff, Beatrice Buchmann, Ernst Sax, Daniel Solèr, Monica von Toggenburg e Daniel Tuor.
Il nov cussegl administrativ ha en in proxim pass da chattar ina ni in mainafatschenta che ha d'elavurar las schliaziuns en ils champs sco mancanza da persunal qualifitgà, structuras dad ICT ed organisaziun per arrivar al maletg da mira. Tge che munta ch'ils manaschis da las instituziuns da sanadad duessan l'onn 2027 vegnir transferidas a la nova societad d'aczias.
Critica ed extradas da la SanaSurselva procuran per letras grassas
Era sche las bleras instituziuns e vischnancas festiveschan la fundaziun da la «Reit da sanadad», datti da quellas che stattan sin distanza. Entaifer il process da svilup dals davos trais onns han quatter instituziuns da sanadad e quatter vischnancas desistì d'ina participaziun. Ils craps da stgarpitsch: la vischnanca da Glion ha suenter la nunelecziun da sia candidata per il cussegl administrativ, Caroline Gasser, dà in chanaster a la nova societad.
Las vischnancas da Laax e Schluein han crititgà fermamain il fatg ch'ins veglia fundar ina societad d'aczias, bain savend che l'ospital regiunal sco instituziun principala scriva cifras cotschnas. Plinavant mettan ellas la fundaziun d'ina SA senza il consentiment dal suveran en dumanda.