Siglir tar il cuntegn

Sanasurselva La populaziun na tschenta betg en dumonda il spital

Segirar il provediment da sanadad en tut las regiuns è ina sfida. Ospitals ed instituziuns han da sbatter cun las finanzas e tschertgan persunal – er en Surselva. En quest connex avain dumandà vossa opiniun. Il fazit: Ils custs duessan sa sbassar, ma il provediment tuttina restar en la regiun.

Dapi in temp n'han ils presidents communals da la Surselva betg pli il fain sin il medem ladritsch cura ch'i va per il Spital regiunal da la Surselva a Glion. Las dispitas han manà tar trais abdicaziuns da presidents communals ord la suprastanza da la SanaSurselva. In fatg che dat da pensar a la populaziun Sursilvana sco nus avain intervegnì tar il viadi cun il microfon atras la Surselva.

I fa fitg quitads. Jau na sai betg sch'ins po simplamain agir uschia. Igl è simplamain fitg grev, ma sch'ins na sa croda betg en in gremi èsi anc pli grev ed ins na vegn betg vinavant.
Autur: Um da la vischnanca da Sumvitg

Sper la glieud sin via, avain nus er fatg ina retschertga online. 60% da las persunas dumandadas èn da l'avis che la suprastanza da la Sanasurselva na fetschia betg buna lavur. Las reacziuns da la populaziun pudais leger en las gallarias.

Tge è la Sanasurselva?

Avrir la box Serrar la box

La Sanasurselva è ina corporaziun da vischnancas da dretg public ed è responsabla per garantir il provediment da sanadad da la Surselva, confurm al basegn ed economicamain optimal. La corporaziun da vischnancas promova la colliaziun e la collavuraziun da tut ils secturs dal provediment da la sanadad.

Concret munta quai che la Sanasurselva surpiglia las incumbensas ed ils dretgs da las vischnancas en connex cun il provediment da sanadad. Oravant tut surpiglia la Sanasurselva las incumbensas che sa dattan or da la lescha per promover la tgira da malsauns en la regiun d'ospital Surselva.

La fin favrer 2024 ha la Sanasurselva fundà la nova «Reit da sanadad Surselva SA». Quella organisaziun duai surpigliar las organisaziuns da sanadad actualas sco il Spital regiunal, las chasas da vegls ed attempads e las organisaziuns da Spitex e manar quellas a moda centralisada.

En connex cun tut las sfidas dad organisar il provediment da sanadad en las regiuns avain tranter auter vulì savair da vus, tge ch'è pli impurtant: Ina purschida extendida che custa dapli ubain spargnar ed avair be ina purschida da basa? Cun var dus terzs da las participantas e dals participants ch'èn per sbassar ils custs è questa resposta clera:

Diagramm über Versicherungsausgaben mit Fragezeichen.
Legenda: RTR

Interessant è lura il cumparegl cun l'ulteriura dumonda en quest connex: In'ospital da manaivel en la regiun che custa dapli ubain in ospital da center ch'è pli bunmartgà però per bleras e blers era pli lunsch davent? Qua èsi prest ina situaziun da pat cun in lev avantatg per l'ospital regiunal, malgrà che quel custa dapli.

Ina pli clera opiniun han ils participants e las participantas percunter gì sin la dumonda schebain la populaziun po sa participar avunda a decisiuns davart il provediment da sanadad? Trais quarts èn da l'avis che quai n'è betg il cas. La populaziun duai pia vegnir pli savens a pled en chaussa.

Diagramm zeigt 25% Ja und 75% Nein zur Teilnahme an Entscheidungen.
Legenda: RTR

Ina pussaivaladad per far gist quai fiss la proxima dumonda, numnadamain: Èsi la dretga via da metter tut las instituziuns da sanadad (ospital, spitex, chasas d'attempads, etc.) dad ina regiun sut in tetg? Entant ch'autras regiuns han gia fatg midadas en questa direcziun sa chatta la Surselva permez quest process ed ils avis da promoturs ed instituziuns da sanadad van adina puspè in ord l'auter. L'opiniun da las persunas ch'èn sa participadas a la retschertga da RTR è dentant cleramain en favur d'ina uschènumnada «rait da sanadad» cun tut las instituziuns d'ina regiun sut in tetg.

Situaziun dals ospitals en Grischun

Avrir la box Serrar la box

Blers ospitals grischuns han problems finanzials. Plirs facturs chaschunan rusnas en las cassas. RTR ha analisà la situaziun actuala per mussar ils problems ed eventualas schliaziuns.

Ospitals grischuns en la crisa

La enquista da RTR

Avrir la box Serrar la box

Nus avain fatg sis dumondas davart il provediment da sanadad regiunal – intginas pli generalas ed intginas specificamain per l'exempel da la Sanasurselva.

  1. Avais Vus duvrà purschidas da l'Ospital regiunal Surselva durant l'onn passà?
  2. Essas Vus pront da pajar dapli taglia per mantegnair l'ospital regiunal cun ina purschida extendida u preferis Vus da pajar pli pauca taglia per ina purschida da basa?
  3. È per Vus in ospital ch'è datiers cun ina purschida vasta pli impurtant, era sche quai chaschuna custs da sanadad pli auts – u acceptassas Vus vias pli lungas en in ospital da center per spargnar custs?
  4. Essas Vus da l'avis che la suprastanza da la Sanasurselva fa buna lavur per il provediment da sanadad?
  5. Po la populaziun participar avunda a decisiun davart il provediment da sanadad?
  6. Sustegnais Vus la proposta da metter tut las instituziuns da sanadad da la Surselva (ospital, spitex, chasas d'attempads, etc.) sut in tetg?

275 persunas han respundì a tuttas dumondas. L'enquista n'è betg represchentativa ed è stada online dals 20 fin ils 24 da favrer 2025.

RTR actualitad 07:00

Artitgels legids il pli savens