La Spital regiunal Surselva SA scriva cifras cotschnas, sco quai è il cas tar tut ils ospitals regiunals en il Grischun. L'ospital sursilvan ha fatg l'onn passà in deficit da 2,3 milliuns francs – e l'onn 2022 in tal da 1,4 milliuns francs. Pervia da quai ha l'ospital dumandà las vischnancas per bratsch ed agid finanzial, per pudair mantegnair il manaschi.
Ils delegads e las delegadas da la Sanasurselva vulan laschar analisar las structuras da l'ospital tras ina firma externa. Ma quella incumbensa sto anc spetgar cunquai ch'il chantun fa sia atgna analisa. Il departament da sanadad vul il proxim temp far in'analisa economica da manaschi. Cun quella duain ils ospitals da Tavau, Schiers, Tusaun, Scuol e Glion vegnir cumparegliads. Cun ils resultats da l'analisa dal chantun quintan ils responsabels da la Sanasurselva en il decurs da questa stad. Uschia ha la radunanza da delegads votà unanimamain – da betg far en il mument atgnas analisas e decider suenter la risposta dal chantun co vinavant.
Patrick Schaniel è il nov president
Il delegà e president communal da Sumvitg, Patrick Schaniel, surpiglia davent da quest fanadur la batgetta da la Sanasurselva. El n'ha però betg pudì esser preschent durant la radunanza da delegads e delegadas a Breil.
Manchentà l'elecziun ha uschia ses cuntracandidat, il delegà e president communal da Laax Franz Gschwend. Las vischnancas da Laax e Schluein quintan bandunar la Sanasurselva sin la fin da l'onn 2025. Quai pervia da discharmonias che pertutgan dumondas enturn la finanziaziun da la Spital regiunal Surselva SA. Plinavant è in plant da las duas vischnancas encunter la Sanasurselva avert tar la Dretgira administrativa dal chantun Grischun.
Ma quels fatgs n'han betg impedì Franz Gschwend ed il delegà e president communal da Schluein Ralf Schläpfer, da candidar per posts en la suprastanza da la Sanasurselva. Cuntrari a Gschwend, han ils delegads e las delegadas elegì Schläpfer scoo suprastant da la Sanasurselva.
Las bleras vischnancas ed instituziuns da sanadad sursilvanas han fundà il fanadur passà la Reit da sanadad Surselva SA. Cura che quella daventa l'onn 2027 operativa, duess la Sanasurselva vegnir integrada en la corporaziun da vischnancas, la Regiun Surselva.
