Cun l'elecziun dals otg commembers en il cussegl administrativ datti pliras persunas che han in rollas dublas. Quai munta ch'ellas èn en in cussegl administrativ d'ina da las societads ni fundaziuns affiliadas a la nova societad tetgala. Qua ina survista:
- Manfred Manser è nov president dal cussegl administrativ da la Reit da sanadad SA sco er vicepresident da la Spital regiunal Surselva SA. Sco el ha communitgà vegn el a sa retrair dal ospital regiunal cura che la nova societad daventa operativa.
- Martina Beeli è en il mument presidenta da la corporaziun da vischnancas SanaSurselva sco era commembra dal cussegl administrativ da la Spital regiunal Surselva SA. Sco nova commembra dal cussegl administrativ da la reit, na vesa ella nagin conflict d'interess sch'ella mantegn ses mandat tar l'ospital regiunal. Sco presidenta da la corporaziun da vischnancas vegn ella a sa retrair.
- Il nov elegì commember dal cussegl administrativ da la rait è cussegl administrativ tar la fundaziun Steinhauser-Casanova a Cuort. El na quinta betg da sa retrai da quest mandat.
- Medemamain betg da sa retrair quinta Daniel Tuor ch'è sper ses nov mandat tar la Reit da sanadad president da la cumissiun casa da la Casa s. Martin a Trun. El haja sclarì quai cun la fatschenta KPMG ch'è mainaproject.
Auter ch'intginas commembras e commembers dal cussegl administrativ vesa quai Marc-André Giger ch'è mainaproject e che accumpogna ils responsabels tar ils svilup da la Reit da sanadad. Enfin l'onn 2027, cura che la fatschenta daventa operativa, sajan las funcziuns dublas da schliar, manegia el.
Rollas dublas ston sin il pli tard cura ch'il chapital da las instituziuns vegn integrads en la Reit da sanadad SA, vegnir schliadas.
Critica envers la legitimaziun da las vischnancas
Las acziunarias ed acziunaris han gì da suttascriver ils documents per fundar la nova societad d'aczias. Tranter auter han ellas signà in contract d'obligaziuns. Ina da las criticas encunter la Reit da sanadad Surselva SA vegn da Ralf Schläpfer, il president communal da Schluein. Lez aveva detg en ina intervista avant in pèr emnas ch'ils responsabels da las vischnancas duvrassan il consentiment dal suveran per pudair concluder ina participaziun tar ina societad d'aczias che haja l'intent d'ina collaboraziun tranter las vischnancas.
Tgi che po decider davart ina participaziun vida instituziuns, corporaziuns e collaboraziuns regiunalas è reglà en las constituziuns communalas. Uschia per exempel era ella constituziun da la vischnanca da Tujetsch che preveda che la radunanza communala ha decider sch'ella vul sa participar ad in'organisaziun dil dretg privat.
Sch'ins è encunter il project, alura vegn ins cun da quels arguments sco, vus n'avessas betg pudì far quai. Ma cura che nus avain da suttascriver in contract da prestaziun, alura vesa quai ora auter.
Tenor Martin Cavegn, il president communal da Tujetsch, haja la suprastanza communala decidì da sa participar a la Reit da sanadad Surselva SA, cunquai che lezza è anc èn ina fasa da project. Tenor il contract d'obligaziuns per acziunarias san las vischnancas vender las aczias a la SanaSurselva enfin la fin da l'onn 2026. Entaifer quai temp stoppia l'organ cumpetent alura decider sch'ella na vul, ni betg, sa participar definitivamain a la Reit da sanadad Surselva SA.
Tenor Thomas Kollegger, il manader da l'Uffizi da vischnancas, hajan las vischnancas pliras opziuns da prender per maun ina tala decisiun. Per esser segirs che nagin fetschia in plant tar la Dertgira administrativa, avessan ils responsabels pudì laschar decider l'organ responsabel davart ina participaziun cun resalvas ed alura laschar decider il suveran davart ina participaziun definitiva cura che quella è madira.
