Ils 13 da settember aveva il parlament communala da la vischnanca da Mustér approvà la nova organisaziun communala cun il model da departament. La finamira era da introducir quel cun l’entschatta da la perioda d’uffizi nova sin l’entschatta da l’onn. A la fin ha la lavur per elavurar il reglament communal cuzzà pli ditg, uschia ch'ella è pir uss vegnì sin maisa tar il parlament communal.
Uschia vegn introducì il sistem da departament enstagl da la direcziun communala. La finamira principala è che fatschentas communalas pon vegnir tractadas pli simpel ed effizient, uschia l’argument principal da la suprastanza communala. Surtut duajan fatschentas dal mintgadi vegnir tractadas a moda simpla, senza chaschunar dapli birocrazia. Uschia pon ils responsabels dals departaments, pia ils «manaders da sparta» decider sur d'expensas entaifer il preventiv approvà. Davart expensas ordaifer il preventiv pon ils «manaders da sparta» communabel cun il responsabel dal departament decider fin ina expensa da maximal 20'000 francs ad onn. Las fatschentas strategicas restan en cumpetenza da la suprastanza communala.
Idea per in artitgel per resguardar il commerzi indigen
Ina da las propostas ch'è vegnida fatga a la sesida dal parlament communala era in artitgel che pretenda da resguardar tar cumpras il commerzi indigen che paja taglia en vischnanca. La suprastanza communala ha dentant argumentà ch’in tal artitgel cuntrafetschia a la lescha surordinada. Uschia è la finala la proposta vegnida menziunada en preambel. Uschia stat uss scrit a l'entschatta dal reglament ch'il commerzi merzi indigen duai vegnir resguardà, sch'i na dat nagina sfalsificaziun da concurrenza.
Era da discutar han dà las cumpetenzas da la cumissiun da construcziun che survegn las cumpetenzas da decider las dumondas da construcziun, sco era las cumpetenzas finanzialas ch’ils responsabels da l’administraziun survegnan en l’avegnir.
La scoletta e la halla Cons survegnan solar sin tetg
Era decis unanimamain ha il parlament da Mustér da construir sin ils bajetgs da la scoletta sco era sin la halla Cons indrez fotovoltaics. Per far quai ha la vischnanca dumandà pliras fatschentas, sulet ina offerta è la finala vegnida inoltrada. Las investiziuns communalas muntan a rodund 200’000 francs e la producziun d’energia electrica po cuvrir il diever annual da la scola Mustér. Ils responsabels quintan che las investiziuns èn amortisadas en 10 onns. Sin ils bajetgs da la scola veglia e nova duai dar pli tard indriz fotovoltaics cura che quels dus bajetgs vegna sanads e renovads. Cura che quai vegn ad esser è anc betg decis.