La vischnanca da Mustér ha laschà examinar d’ina interpresa externa las structuras communalas. Quella è vegnida tar la conclusiun ed ha en quai senn cusseglià la suprastanza communala da schliar il sistem da direcziun en favur d’in sistem da departament. L’idea fundamentala è da simplifitgar las vias da decisiun e da vegnir pli speditivs, uschia è vegnì orientà a la sesida dal parlament communala la gievgia saira. La via sur ina direcziun communala pretendia dapli sesidas e dapli lavur ed uschia era dapli birocrazia e quai possian ins evitar cun simplifitgar las structuras.
Ils sistems han avantatgs e dischavantatgs
In dumonda che vegnida tschentada è quella sche las suprastantas ed ils suprastants n’han betg anc dapli lavur cun far quella midada. Qua han ils represchentants da l’interpresa externa empruvà da mussar che la midada na dettia betg dapli lavur, ma che las suprastantas ed ils suprastants survegnia dapli cumpetenzas da decider en lur departament.
Per exempel ha il president communal René Epp mussa ina fatschenta che vegniss pli simpla. Uschia possia la suprastanta u il suprastant responsabel oz betg decider sur d’ina cumpra simpla, quella stoppia vegnir tractada da la direcziun e quai muntia dapli lavur administrativa ed uschia duria quella era pli ditg. En l’avegnir duai esser pussaivel ch’il schef da departament po communabel cun il manader dal uffizi decider en atgna cumpetenza sur d’ina cumpra en il rom da las cumpetenzas finanzialas.
Quai n’ha nagina dals parlamentaris mess en dumonda, sulet sche quai dettia betg dapli lavur a las persunas en suprastanza quai che saja gia oz in problem da chattar persunas che vegnan d’ademplir ils pensums anc dasper la professiun. La finala eran dapli dumondas avertas che scleridas uschia ch’il parlament ha decis da betg entrar en la fatschenta. L’avust vegni probabel a dar ina orientaziun exclusiva per il parlament sur dals resultats da la retschertga da l’interpresa externa ed ils 30 da settember duai la fatschenta vegnir tractada a la proxima sesida dal parlament communal da Mustér.
Decis scumond da fieus artifizials
En ina iniziativa communala cun 155 suttascripziuns valaivlas era vegnì pretendì in scumond absolut da fieus artifizials sin intschess communal. La suprastanza communala ha preschenta ina cuntraproposta in zic midada. Uschia èsi formulà che vulcans e fieus artifizials che na fan betg canera possian er en l’avegnir vegnir fatgs a Mustér. Per auters fieus bengals ed artifizialas vegn introducì in scumond sin l’entir intschess e quai la finala cleramain cun 9 gea cunter 3 na e 2 abstenziuns.
