La cumissiun da gestiun duai puspè esser colliada cun il parlament ed esser ina cumissiun deliberanta. Tenor il dretg vertent na possia la cumissiun da gestiun betg s'exprimer directamain en las debattas en il parlament (cussegl da vischnanca) tar dumondas da finanzas sco era tar auters fatgs impurtants, uschia la moziun dal parlamentari Edgar Durschei, suttascrita d'ulteriurs 11 parlamentaris.
Il mument va tut sur la suprastanza
En il mument va tenor la constituziun da Mustér tut sur la suprastanza: La cumissiun da gestiun ha da controllar l'administraziun e rapportescha tge ch'ella ha constatà a la suprastanza communala. Lezza suttametta il rapport silsuenter al parlament.
Edgar Durschei argumentescha che l'idea da la cumissiun da gestiun tar in parlament sco Mustér saja ch'il parlament possia er involver la cumissiun senza ch'ins stoppia eleger ina cumissiun predeliberanta or dal parlament che sa dat giu cun ils fatgs. Cumissiuns da gestiun cun glieud dal parlament enconuschian vischnancas sco Glion e Cuira. Quai saja plinavant era uschia tar chantun e Confederaziun.
Betg ina nova idea
Ina cumissiun cun parlamentaris sco commembers n'è betg ina nova idea a Mustér: Avant 10 onns era la cumissiun da gestiun exact quai ch'ils parlamentaris dumondan ussa, mo ch'ella sa cumponiva alura mo or da parlamentaris. In'iniziativa dal pievel inoltrada l'onn 2012 haja vulì midar quella funcziun da la cumissiun da gestiun, uschia ha ditg il president communal da Mustér, René Epp. Il suveran da Mustér aveva votà cun passa 65% da las votatantas e dals votants per midar la funcziun da la cumissiun da gestiun uschia sco ella è ussa. Dapi quella midada haja il parlament strusch percepì la cumissiun da gestiun, manegia Edgar Durschei ch'è dapi blers onns en il parlament da Mustér (cussegl da vischnanca).
La cumissiun da gestiun è insanua denturn, ella guarda il quint annual, ma ins n'ha betg pudì involver ella.
Per il moziunari Edgar Durschei è in dals exempels negativs dal sistem vertent stà, cura ch'il parlament haja vulì savair daco che la cumissiun da bajegiar haja dà giu l'uffizi en globo l'onn passà. La dumonda dal parlament haja stuì ir sur la suprastanza per che la cumissiun da gestiun haja dastgà dar resposta. Tenor il president communal, René Epp, haja la cumissiun da gestiun pudì far sia lavur sco gremi autonom ed independent. La discussiun haja silsuenter gì lieu entaifer il parlament.
La cumissiun da gestiun è in organ autonom che dat giu rapport ed or da quest rapport pon ins prender ina u l'autra chaussa impurtanta per tematisar en il cussegl da vischnanca.
Cumissiun da gestiun ha demissiunà en globo
Esser en la cumissiun da gestiun da Mustér saja il mument tut auter che attractiv, l'entira cumissiun da gestiun ha dà giu l'uffizi sin la fin da questa legislatura. Edgar Durschei suppona che la cumissiun da gestiun ha dà giu en globo l'uffizi perquai che la cumissiun fetschia gronda lavur davostiers, ma ella n'haja betg ina cumissiun da contact ed era betg in lieu da rapportar. Bain ch'ella haja la suprastanza, haja ella da controllar quels ch'exequeschan e na po uschia betg rapportar insanua auter. Quai na cuntentia betg. René Epp manegia che quest na saja insumma betg uschia. Ed las lavurs restian exact las medemas era sch'ins midia la funcziun da la cumissiun da gestiun .
Uschia sa tschenta la dumonda tge che la cumissiun da gestiun duai en l'avegnir esser? In gremi independent che controllescha l'administraziun u in gremi predeliberant dal parlament cun funcziun da controllar l'administraziun.
Cunquai che Mustér stuess reveder sia constituziun communala sch'ins vul midar insatge vi da la cumissiun da gestiun, èsi tenor René Epp d'examinar pli exact la constituziun actuala ed instradar per quella lavur ina cumissiun. A quella cumissiun pudessan lura differentas persunas or da la populaziun assister, cumprais lien parlamentarias e parlamentaris.
