La vischnanca da Mustér mida ses sistem d’administraziun. Uschia vegn la direcziun communala remplazzada tras in sistem da departaments nua ch’ils manaders dal departament survegnan era cumpetenzas finanzialas, quai ha il president communal René Epp ditg a l’orientaziun publica.
La finamira saja da vegnir pli effizient, pli spert, pli simpel e pli agil, uschia il president da vischnanca. La midada è vegnida instradada suenter las examinaziuns tras ina interpresa externa. En la proxima sesida dal parlament communal ils 20 da zercladur vegn lez a discutar ed alura a stuair approvar la midada.
Betg chanzlist mabain mainafatschenta da l'administraziun communala
L’administraziun communala da la vischnanca da Mustér vegn reorganisada dal tuttafatg. Uschia datti da nov in mainafatschenta: Roland Cajacob. Quai scriva la suprastanza communala.
Cajacob aveva avant la funcziun da manader infrastructura. Uss è el responsabel per la gestiun ed organisaziun da l'administraziun e tranter auter per las resursas umanas. Ses substitut daventa Romeo Schmed.
Era per las finanzas vegn creà in nov post sco manader da finanzas. Elegì per quest post han ins Rita Genelin, ch’è gia engaschada en l’administraziun communala.
Daco tut questas midadas?
La raschun per las midadas en l’administraziun saja per l'ina che plirs – per exempel Ervin Maissen – van en pensiun. Per l'autra la midada professiunala dal chanzlist Andri Hendry. Lez banduna la vischnanca da Mustér suenter 34 onns e va a lavurar tar la vischnanca da Tujetsch.
Tgi surpiglia l'anteriur post da Roland Cajacob?
Successur per il post da manader infrastructura è Urban Maissen. El vegn pia ad esser responsabel surtut per l’administraziun da bajegiar, la planisaziun locala e differents projects d’infrastructura turistica.
Sustegn survegn Urban Maissen da Sandro Muscas, che vegn ad esser responsabel per projects da vias. Omadus cumenzan cumplainamain la fin dal 2024.
Nov responsabel per la serenera ed ils pumpadis
Pervi dal pensiunament d’Aluis Cabernard è era stà da tschertgar in nov manader per la serenera. Elegì è vegnì Pierino Bisquolm. El cumenza tar la vischnanca il settember e vegn a surpigliar cumplainamain la nov’incarica sco manader da la serenera a partir da l’entschatta matg 2025.
