Suenter l’emprima audiziun il zercladur aveva il parlament da la vischnanca da Mustér incumbensà la suprastanza da sclerir pliras dumondas avertas e d’infurmar il parlament en detagl davart las midadas. Quella infurmaziun exclusiva per il parlament è succedida l’avust. Uschia eran ils puncts averts quasi sclerids. Sulettamain il plan da plazzas ha dà da discutar. La finala è vegnì proponì da stritgar dal tuttafatg las prescripziuns en connex cun emploiads communals. La pretensiun è che la suprastanza sto en il budget cumprovar ed argumentar en detagl la summa da pajas communalas en l'avegnir. Uschia possia la vischnanca esser pli flexibla en connex cun engaschar persunal necessari ed il parlament possia direct intervegnir via il budget communal ed uschia franar pussaivels excess finanzials per la vischnanca, uschia è vegnì argumentà da pliras varts.
Nov sistem da parlament è uss sancziunà
Il parlament communal ha la finala decidiu da sancziunar la midada da las structuas communalas, aschia ch'il nov sistem da departaments po vegnir introducì. L’idea fundamentala è da simplifitgar las vias da decisiun e da vegnir pli speditivs. La via sur ina direcziun communala pretendia dapli sesidas e dapli lavur ed uschia era dapli birocrazia e quai possian ins evitar cun simplifitgar las structuras. Cunquai che la fatschenta ha duvrà duas sesidas dal parlament è la suprastanza communala sfurzada da instradar immediat la transfurmaziun da las structuas novas. la finamira è da implementar quellas definitiv cun l’entschatta da l’onn proxim.
Moziun per rinforzar la cumissiun da gestiun
Era la moziun ch’era vegnida inoltrada il zercladur d’ina gronda part da las parlamentarias ed ils parlamentaris è vegnida approvada unanimamain. La suprastanza communala ha recumandà da far quai ed ha gist proponì d’instradar ina cumissiun speziala per prender a mauns la revisiun parziala da la constituziun communala. Dasper rinforzar la posiziun da la cumissiun da gestiun duajan anc plirs ulteriurs puncts vegnids prendids sut la marella. L’auter onn duai la cumissiun nova cumenzar cun la lavur, ella vegn a sa cumponer tranter auter dal moziunari, dal president communala e da trais persunas dal parlament sco era da trais persunas ord la populaziun. In termin cun la revisiun da la constituziun communala vegn en votaziun na datti anc betg.