Mustér - Avertura da la pli lunga punt pendenta dal Grischun

Massa persunas èn vegnidas a mirar ed er a traversar la nova punt pendenta a Mustér. Uschia èn quasi 700 persunas vegnidas a Sontga Gada tar l’avertura uffiziala da la punt d’ina lunghezza da radund 270 meters ed in'autezza da 100 meters. E la satisfacziun tar las iniziantas ed ils inziants era gronda che la populaziun ha plaschair da la nova punt, di tant Christian Loretz, il president da l’uniun, sco era Leo Condrau che fa part da la suprastanza. Pertge suenter la votaziun a Mustér era la malsegirtad gronda che la populaziun na veglia betg quella punt, di Leo Condrau. Ma la preschientscha dad uschè blera glieud discurria in'autra lingua.

Finanziaziun garantida

La pli gronda satisfacziun per l’uniun è che la finanziaziun è uss garantida dal tuttafatg. La gievgia passada ha il «Padrinadi svizzer per vischnancas da muntogna» garantì ina contribuziun da radund 50’000 francs ed uschia serrà quella fora da finanziaziun, di Christian Loretz. Pertge da vegnir ensemen cun dus milliuns francs e quai per gronda part cun agid da sponsurs e donaturs saja stà ina sfida ed era in burdi, di Christian Loretz. Ma uss hajan els pudì surdar la punt a la vischnanca da Mustér e quai senza daivets e finanziada cumplettamain.

Averta stad ed enviern

Uss è pia la colliaziun cun il vischinadi da Mumpé Medel era garantida sur ina punt. Quai munta per las abitantas ed ils abitants dal vischinadi ch’è collià via in tunnel che maina en la chavorgia «Las Ruinas» e ch’è ils ultims onns era gia stada interrutta in levgiament. Per Gion Battesta Manetscha che viva gia sia vita a Mumpé Medel va uschia in siemi en vigur – in siemi ch’els hajan gì savens d’uffants cura ch’els han bleras giadas stuì traversar la val, enstagl da pudair far la traversada sur ina punt.