En tut èn vegnids plazzads radund 22 tonnas sin la punt, il equivalent da 200 persunas, ha il president da l’uniun Christian Loretz confermà. E lura è vegnì mesirà co che la statica da la punt sa cuntegna cun il pais. Las mesiraziuns han mussà ch’ils inschigners han quintà bain. Cun il pais maximal è la punt sa sfundrada enta mez per circa 80 centimeters, la differenza cun il quint è sulet paucs centimeters, uschia che nagin è vegnì gnervus e tuts èn stads cuntents, di Christian Loretz.
Test voluntari
La punt è stada a fin quasi in mais pli baud che quintà, uschia ch’ils responsabels da l’uniun han fatg ponderaziuns dad era testar la punt, declera Christian Loretz. Per agid han els alura clamà ils pumpiers da Sursassiala ch’han plazzà 35 chistas da palettas sin l’entira lunghezza da 300 meters ed emplenì ellas cun aua, quai pass per pass per pudair documentar tut.
Tals tests èn unics en Svizra, di l’inschigner responsabel da l’interpresa Jakob, Fabian Graber, e perquai anc pli interessants. Ils resultats na duajan betg esser per il truclet, mabain vegnir analisads e publitgads per tut las persunas interessadas, di Fabian Graber. In dals motivs è ch’i n’existian betg propi datas da mesiraziun da talas punts, era perquai che mintga punt è in prototip.
Tut ha funcziunà sco planisà
Els sajan fitg cuntents cun ils resultats. Era sch’ins na possia anc betg dir tut en detagl, sche possian ins dir che las mesiraziuns correleschan bain cun las calculaziuns ch’ins ha fatg, di Christian Loretz. Propi interessant vegni alura l’enviern cun naiv e vent. Lura vegn a sa mussar propi, sche tut è vegnì quintà correct. Ma cun il test actual possian ins gia esser pli segir ch’ils quints correspundian er a la realitad, declera Christian Loretz ch’è sez era da professiun inschigner da construcziun.
Cumandant da pumpiers di che la punt tegna
In test han ins gia pudì observar cura ch’il cumandant dals pumpiers da Sursassiala ha gì traversà la punt. El saja surstà quant pauc che la punt haja ballantschà, era cun bler pais. El quinta pia che la punt tegna quai ch’ella empermettia, uschia Gion Tenner. Quai è era necessari, pertge il di d’avertura ils 16 da november èsi planisà da laschar traversar sco emprims ils uffants da scola da Mustér la punt.
