Per Christian Loretz, il president da l'Uniun la pendenta, è la summa da las pendicularas in grond levgiament. El ha pudì annunziar sonda saira a la radunanza extraordinaria da l'uniun pliras bunas novas:
- Las lubientschas dal chantun e da la vischnanca per bajegiar la punt èn tant sco scrittas,
- las organisaziuns d'ambient na han betg objecziuns encunter il project ed
- in dals gronds problems è vegnì schlià, numnadamain, la finanziaziun è cun la summa da Marcus Weber per 90% segirada.
Tge che vul dir cun auters pleds che la punt po vegnir bajegiada.
A mai ha quest fatg tut pel-giaglina. Mo maridar e survegnir uffants è pli bel.
Tenor Christian Loretz po l'uniun uss empustar las sugas per la construcziun da fier. I saja previs da bajegiar ils fundaments la proxima primavaira e sinaquai vegnian alura las sugas montadas. Sin fin da l'onn 2024 possian ins, sche tut giaja tenor plan, traversar la chavorgia da Cuflons, tranter sontga Gada e Mumpé Medel, sur la nova punt.
200'000 francs mancan anc
Per pudair finanziar la punt da radund 1,9 milliuns mancan anc 200'000 francs. Quels vul l'Uniun la pendenta rimnar cun l'agid da sponsurs, sajan quest privats u er autras vischnancas e firmas. Cunquai ch'il project è ussa definitivamain en planisaziun e bainprest en construcziun, vesa la suprastanza anc potenzial da dumandar fundaziuns.
Bain che l'uniun haja dumandà quasi dapertut, giaja la tschertga da meds finanzials vinavant, uschia Christian Loretz. Quest punct ha la radunanza anc discutà. Sper ils donaturs che dattan pli grondas summas, fissi forsa anc pussaivel da cuntanscher dapli persunas ch'èn prontas da dar insatge, ma pli pauc.
Persunas privatas pon en il mument per exempel cumprar in «Pendenta-Meter», vul dir ellas pon cumprar per 1'000 francs ina plachetta cun si il num che vegn alura montada vi da la punt. Enfin uss ha l'uniun survegnì 218 dals 270 «Pendenta-Meters», tants meters sco la punt è lunga. Tge che la radunanza na vul en il futur betg, è da far pajar las viandantas ed ils viandants per ir sur la punt pendenta vi. Ella duai restar publica.
Nova dumonda pertutgant il possess ed il mantegniment
Atgnamain eri previs che la vischnanca da Mustér surpiglia la punt suenter sia construcziun e cun il possess er il mantegniment. Suenter ch'il suveran da Mustér ha sustegnì ils 18 da zercladur il referendum encunter la decisiun da la vischnanca, da sustegnair la construcziun da la punt, resta anc inqual malsegirtad pertutgant quests puncts. Tenor Christian Loretz n'eran il possess ed il mantegniment betg tema dal referendum.
Nus vulain anc ina giada tractar conscienzius quella dumonda.
René Epp, il president da vischnanca da Mustér, accentuescha che la vischnanca haja adina sustegnì la punt pendenta ed i saja in grond cletg d'avair in investider sco Marcus Weber en vischnanca. La suprastanza communala aveva avant il referendum gia decidì da surpigliar il manaschi e la punt, ma cun il Na a l'urna dettia ina tscherta malsegirtad, di il president communal. L'Uniun la pendenta ha uschia anc ina giada da far ina dumonda a la suprastanza communala per che lezza possia tractar conscienzius la nova dumonda.
