La stad passada è il vegl hotel Acla da Fontauna, l'hotel dals Beltgs, vegnì spazzà e quai suenter passa 20 onns ch’el era bandunà. L’interpresa turitgaisa Immoinvest ha previs da realisar sin quest areal in hotel nov, gestiunà da «Möwenpick», e pliras chasas cun abitaziuns. Il volumen d’investiziun munta a radund 100 milliuns francs. Sco ch'ils responsabels avevan communitgà, era planisà da realisar anc quest onn la via d’access nova ed era endrizzar il plazzal. Quai hajan els spustà sin l’onn proxim, di Fredy Ganz, il mainaproject. La raschun saja ch’els hajan vulì surdar las lavurs ad interpresas indigenas, ma las capacitads da quellas na sajan betg stadas avant maun, uschia ch’els hajan spustà il cumenzament da las lavurs.
La survista dal di cun las pli impurtantas novitads per tadlar curt e cumpact.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
Fundament e cumenzament da las lavurs da construcziun
L’onn che vegn è previs da cumenzar alura l’emprim cun la via e las installaziuns e suenter cun las lavurs vi dal fundament, di Fredy Ganz. Els sajan senz’auter anc en il plan e la finamira saja da cumenzar anc il 2025 cun las lavurs da construcziun per l’hotel nov. Era il material da l’hotel vegl ch’è vegnì manizzà fin ed è sin in grond mantun, vegnia duvrà per la construcziun dals novs bajetgs, sincerescha Ganz. Quai saja tut previs uschia ed en lur concept da duvrar uschè bler material reciclà sco pussaivel.
-
Bild 1 von 2Legenda: Il grond mantun cun material ch'è restà suenter la spazzada da l'hotel Acla da Fontauna a Mustér. RTR
-
Bild 2 von 2Legenda: La vista cunter Acletta e las pendicularas, sin il grond mantun da material ch'è uss sin l'areal da l'anteriur hotel Acla da Fontauna a Mustér. RTR
Plirs interessents per las abitaziuns
Era la vendita da las abitaziuns è lantschada e sco ils responsabels han confermà ha quai plirs interessents. Ma las lavurs da construcziun na dependian betg da la vendita d’abitaziuns. Il sulet che Fredy Ganz ha dentant pudì dir sur da la vendita è che l’interess è avant maun e per l’interpresa Immoinvest è il project sin fitg buna via.