Il nov conflict è sflammegià cun ils vischins da las pendicularas e lur possessur Marcus Weber. Quellas han numnadamain il dretg da recumpra sin ina da quellas parcellas davos l'hotel planisà. Quest dretg hajan ins era fatg valair il november, ha Marcus Weber confermà envers RTR. La pussaivladad da desister e stritgar quest dretg or dal cudesch funsil è liada vi da tschertas cundiziuns. Gist en quest punct van las opiniuns dals investurs dal nov hotel e dal possesur da las pendicularas ina ord l'autra.
Entant ch'ils investurs da l'hotel èn da l'avis che la cundiziun è ademplida e las lavurs hajan cumenzà, na vesa Marcus Weber dentant betg sco garantì che l'hotel vegnia spazzà. Perquai ha el instradà ina disposiziun supervisorica cunter la dumonda da stritgar il dretg da recumpra or dal cudesch funsil. Sche l'hotel vegnia tratg giu fin la fin da zercladur, lura vulan las pendicularas desister dal dretg da recumpra.
Nagina chapientscha tar investurs
Da la vart dals investiders «Immo Invest» tuna quai auter. Els èn da l'avis ch'ins adempleschia tut las premissas. Els quintan da cumenzar cun las lavurs grondas da spazzar il mars, e da terminar quellas enfin il zercladur. Cler na saja quai anc betg, sche quai vegnia a retards da las lavurs, ha il mainaproject Fredy Ganz ditg sin dumonda da RTR. Per els saja impurtant da schliar il problem cun il dretg da recumpra a temp, era per signalisar a pussaivels cumpraders ch'il project vegnia realisà. Ma sclauder na possian els tuttina betg che quai vegnia a retards.
I para pia ch'ils investurs adempleschan las premissas. Nua è lura il conflict? Dubis haja Marcus Weber en la finanziaziun dals investurs. Quella na garanteschia betg che l'hotel vegnia propi spazzà. Sch'el desistiss dal dretg da recumpra, lura dess el sias cartas or da maun. El suppona ch'ils investurs stoppian sco emprim vender abitaziuns per insumma pudair cumenzar cun las lavurs. Ils investurs refusan questas reproschas e sincereschan che la finanziaziun per stgarpar giu l'hotel vegl saja garantida.
Mustér emprova dad intermediar
La vischnanca da Mustér è tranter sutgas e bancs. Quai ha ditg il president communal René Epp. Dad ina vart hajan ins invista en ils contracts dad «Immo Invest» ed ins saja da l'avis che la finanziaziun saja garantida. Da l'autra vart na veglian ins betg ch'i dat retards en il project. Ins saja en contact cun tut las duas partidas. Emprovas dad intermediar n'hajan fin uss betg gì success.