Blera glieud è vegnida la sonda per vesair ina giada quest hotel. In hotel nua ch’igl ha bleras giadas gì num ch’el vegnia stgarpà giu, ma el stat era anc suenter 20 onns imposant sper il center da sport e betg dalunsch da las pendicularas da Mustér vid e bandunà. Quai duai sa midar las proximas emnas e mais. Uschia han ils responsabels sincerà che las lavurs da stgarpar giu il bajetg cumenzan glindesdi, l’emprim dentant sulet lavurs endadens.
La sanaziun e las lavurs da rumir sajan cumplitgadas e basegnian segirtad speziala perquai ch’il bajetg cuntegn asbest e PCB. Ma sin l’auter onn duai il hotel esser spazzà e silsuenter cumenzan las lavurs per il nov hotel cun 159 chombras e las tschintg chasas cun abitaziuns, uschia ha declerà il mainaproject da l’Immo Invest Fredy Ganz. Finidas duajan las lavurs esser probabel en trais onns.
Bleras regurdientschas surtut da la scola da skis
Sur onns ora è il hotel stà affittà da l’assicuranza da malsauns Intersoc. Quella purscheva a sia clientella vacanzas socialas en Svizra a Mustér. Uschia deva quai mintga 10 dis in tren spezial da Brüssel fin a Cuira e da là fin la staziun Acla da Fontauna extra construida per quests osps, declera il president communal da lez temps Dumeni Columberg. Uschia han millis da scolaras e scolars da la Belgia giudì vacanzas a Mustér e fatg ils prims pass sin skis. E l’anteriur manader da la scola da skis Duri Huonder sa regorda bain dals osps simpatics e nuncumplitgads. L’emprim di vegnivan partids en las gruppas, mintgamai 12 scolaras sin in scolast da skis ed alura survegnivan tuts chalzers da skis e skis alvs cun si in tatgader dal Intersoc. Quai era ina sfida da chattar per mintgin il dretg chalzer, di Duri Huonder cun in surrir.
Bun che la ruina vegn davent e prender a chasa ina regurdientscha
Per la gronda part da las persunas dumandadas èsi bun che tut vegn uss davent. Sur onns ora hajan ins sperà quai ma pir cura che las maschinas cumenzan cun lur lavur, saja quai segir ch’el vegn era davent, di ina dunna cun in surrir. Ella prenda in pèr tuaglias a chasa, forsa per zambregiar. Auters prendan vaiders da biera ni ina chazzola demontada sut bratsch ed a chasa. Pertge las regurdientschas vi da quest bajetg vegnan a restar per la generaziun ch’ha anc vis las festas dals Beltgs a Mustér per adina.
