Hotel Acla da Fontauna - Las maschinas grondas fan uss lur lavur

Las maschinas eran gia pliras emnas sin il plazzal per cumenzar a spazzar il bajetg principal da l’anteriur hotel Acla da Fontauna. E pli ditg che las maschinas faschevan sulet pitschnas lavurs e pli gronda che la sceptica è vegnida. Ma uss han las maschinas propi cumenzà cun spazzar il bajetg principal da l’hotel.

Bleras da las persunas dumandadas sin via eran satisfatgas che las lavurs han cumenzà e per ils blers deva quai anc da raquintar sur dal temp avant passa 20 onns cura ch’ils Beltgs vegnivan anc cun skis ed a far vacanzas a Mustér. Ma suenter bleras trumpadas cun projects pli gronds e pli pitschens e suenter che l'hotel è stà vid passà 20 onns vegn el uss definitivamain stgarpà giu.

En 5 emnas è il bajetg istorgia

Sco il responsabel Fredy Ganz da l’Immo Invest partenaris ha confermà vegnian els a stgarpar giu l’entir hotel en las proximas tschintg emnas. Impurtant saja uss che tut ils materials vegnian era sortids a moda exacta per ch’els possian pli tard duvrar uschè bler material sco pussaivel per far il betun reciclà. Ma els vegnian a realisar tut a moda speditiva ed il bajetg saja per terra sin il pli tard ils 30 da zercladur.

Quest datum è er ina da las premissas ch’il vischin Marcus Weber, possessur ed investider principal da las pendicularas da Mustér, ha mess als investiders da Turitg. Sch’il hotel è davent sin la stad, alura renunzia el sin ses dretg da recumpra d’ina da las parcellas. Quai vegn uss probabel ad esser il cas. Suenter cumenzan alura las lavurs da construcziun per l'hotel nov e per las chasas cun abitaziuns da vacanzas.