L'Uniun dramatica da Breil preschenta actualmain ses toc «Atras il mir dil curtgin». I sa tracta d'ina cumedia ch'è vegnida translatada ils onns 1960 da Theo Candinas per rumantsch. Il reschissur David Flepp ha adattà il toc per sia equipa d'acturas ed acturs da la vischnanca da Breil.
«I na sa tracta betg d'ina cumedia banala», di David Flepp en discurs cun la FMR. «Atras il mir dil curtgin» tematisescha ina relaziun tranter duas famiglias sco er la relaziun tranter ina giuvna ed in giuven. Il cuntegn è pia actual.
Il toc ha passaschas cun tempo, passaschas pli curtas e pli lungas. I dat parts hilaricas, absurdas e quai dat in ritmus spezial.
Il ritmus spezial dal toc saja ina sfida per las acturas ed ils acturs, di David Flepp. Ed schegea ch'il cuntegn saja per gronda part umoristic, na saja betg tut adina mo legher. Questa cumedia animeschia er il public da s'occupar cun la situaziun ch'il toc teater preschenta, declara Il reschissur.
Return sin Tribuna
Rita Caduff-Cathomas da Danis stat suenter 30 onns per l'emprima giada puspè sin tribuna. Pli baud avev'ella giugà pliras rollas, ma cura ch'ella ha gì la famiglia, n'avevia ella betg pli temp per il teater, declara Rita Caduff-Cathomas. Uss haja ella puspè dapli temp e saja fitg leda d'avair acceptà la rolla sco Trina Milàr.
Il meglier è la lavur che nus faschain sco squadra d'acturas ed acturs. Igl ha dà blers muments intensivs, ma era blers da cumpagnia.
In dals pli bels muments è per l'actura Rita Caduff-Cathomas il sentiment da satisfacziun cura ch'ina producziun reusseschia.
Ina rolla Interessanta
En il toc «Atras il mir dil curtgin» gioga Rita Caduff-Cathomas ina dunna ch'è daventada in pau endirada tras las circumstanzas familiaras e la situaziun cun ils vischins.
Igl è interessant da sa viver en e da giugar quella rolla – era pervi da las reacziuns dals auters.
I dettia mo duas chaussas che sajan differentas vi dal far teater ussa, ch'avant 30 onns, di Rita Caduff-Cathomas: «Jau emprendel betg pli uschè spert ed uschè tgunsch ordadora sco pli baud. I po esser ch'jau hai tuttenina il sentiment ch'il text saja svanì or da mia memoria.» Il reschissur David Flepp declara che quai è in fenomen tut normal. Quai capitia er ad acturas ed acturs professiunals. «Jau hai mez era gia gì talas situaziuns», conceda David Flepp.
-
Bild 1 von 4. Il reschissur David Flepp (amez) cun ils acturs Rita Caduff-Cathomas e Curdin Capaul. Els sa legran da puspè purtar il teater a Breil. Bildquelle: Martin Gabriel/FMR.
-
Bild 2 von 4. Per Rita Caduff-Cathomas e Curdin Capaul èsi l'emprima gia dapi pli lung temp ch'i turnan sin la tribuna, ma quai cun grond elan. Bildquelle: Martin Gabriel/FMR.
-
Bild 3 von 4. Igl saja in toc pretensius, ma cun in cuntegn relevant e rollas interessantas. Bildquelle: Martin Gabriel/FMR.
-
Bild 4 von 4. In dals pli bels muments è tenor Rita Caduff-Cathomas il sentiment da satisfacziun cura ch'ina producziun reusseschia. Bildquelle: Martin Gabriel/FMR.
Leger e leger per memorisar
Il segund actur da Breil ch'ha discurrì cun la FMR avant l'exercizi da teater è Curdin Capaul. El ha gia giugà differentas rollas dapi il 2011. «Ils davos onns hai jau però per motivs familiars e da professiun betg pli giugà teater», di Curdin Capaul. Enstagl haja el surpiglià la lavur sco scrinari da bajegiar las culissas. Tuttenina haja il reschissur David Flepp lura telefornà mez favrer e dumandà el da giugar la rolla dal Tschamun Stivet. L'actur planisà haja numnadamain nunspetgadamain stuì chalar. «Ed uschia sun jau puspè sin tribuna quest onn».
Il toc da quest onn è spezial, betg simpel da giugar e per mai auter ch'ils tocs ch'jau hai gia giugà auters onns.
Era per Curdin Capaul è il memorisar dal text per la rolla la lavur nua ch'el impunda il pli bler temp. Ma «Atras il mir dil curtgin» haja in senn e duai era dar da patertgar al public, di Curdin Capaul.
Ina comedia pretensiusa
Il toc saja pretensius da giugar per tuttas acturas ed acturs perquai ch'el ha passaschas fitg diversas – tempo, lunghezza ed era las emoziuns sa midan adina puspè.
Il toc da teater che nus giugain è ina cumedia, ma igl è betg mo in stecli.
David Flepp saja dentant fitg cuntent cun la repartiziun da las rollas. Las acturas ed ils acturs da la vischnanca da Breil preschentian il toc da teater a moda fitg autentica, di il reschissur.
In'istoria eterna
L'istorgia da «Atras il mir dil curtgin» è situada insacura en la segunda mesadad dal davos tschientaner en in vitg alpin rumantsch. En il center stattan las duas famiglias Milàr e Stivet. Sco vischins abitan ellas dapi decennis paraid encunter paraid, curtin sper curtin – separadas sulettamain d'in mir.
Igl è in'istorgia classica, actuala, ma il medem mument er eterna. Il cuntegn resta adina fitg actual.
Las duas famiglias vivan lur atgnas vitas ed n'han betg la meglra relaziun. Ma sco quai ch'i capita savens: in paliet d'amur tutga lur figlialonza e porta nova dinamica en la vita da las duas famiglias. Cura ch'in medi tut aparti cumpara in di, survegn l'istorgia pir da dretg schlontsch. Il toc è vegnì translatà gia ils onns 1960 da Theo Candinas. Il reschissur David Flepp ha adattà quel per las preschentaziuns a Breil.