La premiera dal toc «Fausta Piuniera» è gartegiada. Il public ch'è sesì sut in tetg ha pudì giudair ina inscenaziun moderna. Uschia èn las radund 75 minutas passadas svelt e senza incaps ed era la plievgia ha spetgà fin ch’il toc è stà a fin. L’inscenaziun è stada fitg divertenta e las scenas han purtà ins 150 onns enavos en il temp, nua che la prominenza or dal mund da la politica, da l’art e da l’economia vegniva a far vacanzas tar la Fausta Capaul a Breil.
Ma betg mancà han era las parallelas en il temp dad oz, cun il viturin che prenda il public per il maun e maina el tras la saira. Surtut plaschì han ils costums ed ils vestgids da las acturas ed ils acturs che laschan propi reviver in temp da piunier, ma era in temp da signuras e signurs sin la tribuna davant l’ustaria Fausta Capaul.
Premiera
-
Bild 1 von 8. Daco na van las dunnas betg a dar jass? Bildquelle: Larissa Cathomen.
-
Bild 2 von 8. Las acturas tematiseschan daco che las dunnas na dastgan betg giugar jass en ustaria. Bildquelle: Larissa Cathomen.
-
Bild 3 von 8. Ils emprims osps èn arrivads tar la Fausta Capaul a Breil. Bildquelle: RTR.
-
Bild 4 von 8. Ils osps arrivan a Breil tar la Fausta Capaul. Da l'artist, sur il commerziant tar l'alpinist. La varietad è gronda. Bildquelle: Larissa Cathomen.
-
Bild 5 von 8. L'uniun dramatica Breil ha mussà in toc da teater impressiunant e giugà tant per rumantsch sco era tudestg. Bildquelle: Larissa Cathomen.
-
Bild 6 von 8. Il viturin maina il public tras la saira. Bildquelle: RTR.
-
Bild 7 von 8. Era culms vegnan ascendids durant il teater. Bildquelle: RTR.
-
Bild 8 von 8. Il public avant il cumenzament da la premiera ha pudì giudair ina tschaina avant la producziun sin la plazza da scola. Bildquelle: RTR.
Inscenar teater en il liber è ina sfida
Ina inscenaziun en il liber è adina ina sfida, surtut quai mument cura ch’ins vegn da las salas d’exercizi en dadens per l’emprima giada sin il palc, di il reschissur dal toc David Flepp. Ma quai saja er in bel mument, perquai ch'ins vesia tuttenina chaussas ch’ins n'ha betg spetgà e quai fetschia spezial inscenar in toc en il liber.
L’inscenaziun è ina collascha en tschintg scenas singulas che giogan tant en il passà sco er en il preschent. Mintgamai vegnan osps cun la charrotscha a far vacanzas e Breil tar la Fausta Capaul. Las acturas ed ils acturs da l’uniun dramatica a Breil han da schluitar en differentas rollas e giogan ina giada per rumantsch e l’autra giada per tudestg, ma era dunnas che giogan umens e viceversa. Quai saja sia filosofia preferida co giugar teater, di David Flepp, era ch’ins improviseschia quasi fin a la premiera. Quai sa mussa era che quai na saja anc betg propi cler co il toc fineschia la finala, di il reschissur.
Emprova sin il palc
-
Bild 1 von 6. Las acturas ed ils acturs èn per l’emprima giada sin il palc avant l’ustaria Fausta Capaul. Bildquelle: RTR.
-
Bild 2 von 6. David Flepp, il reschissur, mussa co sa muventar sin la tribuna gronda. Bildquelle: RTR.
-
Bild 3 von 6. Il toc gioga davant la Casa Fausta Capaul, il lieu original da l'agir da la piuniera dal turissem a Breil. Bildquelle: RTR.
-
Bild 4 von 6. David Flepp instruescha las acturas ed ils acturs da l’uniun dramatica Breil. Bildquelle: RTR.
-
Bild 5 von 6. La charrotscha da chavals maina ils osps a Breil tar la Fausta Capaul. Bildquelle: RTR.
-
Bild 6 von 6. Las acturas ed ils acturs èn per l’emprima giada sin il palc davant l’ustaria Fausta Capaul. Bildquelle: RTR.
Il toc sa basa sin funtaunas secundaras
La basa dal toc da teater èn las funtaunas secundaras dals osps ch’han visità la Fausta Capaul, surtut il cudesch d’osps ed il diari da Georg Finsler, quai sulet per numnar duas funtaunas. Il motiv principal per quai agir è ch'i na dat nagin relasch en scrit da la Fausta Capaul. Perquai han ins cun quels tschintg maletgs empruvà da mussar la tenuta da quest temp ed il cumenzament dal turissem a Breil. Ina dumonda resta averta – sa mussa la Fausta Capaul era sin il palc?