Teater Mustér - «Tge stress pervia d’ina statua»

«Duas vischnancas vischinas vulan schliar lur dispitas cun la construcziun d’ina statua da pasch sin ils cunfins. Ma la statua procura per dapli carplina, boicots e la finala per ina dretgira. Quella vegn manada dals uffants e lez decidan.» Uschia sa lascha resumar il cuntegn da l’emprima cumedia scritta da Hubert Giger. Fin uss è Hubert Giger cunzunt enconuschents sco autur da la «Stria da Dentervals», in roman istoric ch’è vegnì manà si sco toc da teater en il liber la stad 2019 a Mustér. L’emprima cumedia gioga cun la lingua e las acturas ed ils acturs da la gruppa da teater Mustér dattan colur als dialogs uschia ch’igl è divertent e dinamic.

Era uffants sco acturs

Gia tar ils prims discurs tranter la reschissura Tina Bundi e l’autur Hubert Giger èsi stà cler ch’els veglian integrar ina gruppa d’uffants. Cunquai che la gruppa da teater ha gia dapi blers onns era ina gruppa da teater d’uffants è quai giavisch da l'autur era immediat vegnì realisà. «Quai è ina gronda schanza da pudair integrar la gruppa d’uffants da l’uniun en l’inscenaziun dals creschids e da las creschidas e da profitar in da l’auter», di Tina Bundi. En tut giogan 15 persunas sin tribuna: sis uffants da 11-13 onns sco gruppa d’uffants e duas giugadras da 15 onns giogan rollas singulas. Il mument sa cumpona la gruppa da teater Mustér da 34 commembras e commembers.