La gruppa da teater Ratatuglia S-chanf exista dapi bunamain 30 onns. Ella preschenta mintg’onn la fin dal schaner in toc en lingua rumantscha. Actualmain è quai l’unica gruppa da teater che gioga e mussa cumedias en putèr sin il palc.
Da chattar mintg’onn avunda acturas ed acturs saja mintgatant pli difficil, di la presidenta da la societad, Annastasia Parli.
Dapi in pèr onns avain cumenzà da schlargiar la tschertga d’acturas ed acturs er en l’Engiadina Bassa. Quellas persunas discurran dentant adina en lur idiom.
Il num da la gruppa da teater da S-chanf permetta en sasez era ch’i dat ina masdira da persunas da differentas vegliadetgnas ed er idioms.
Mix da putèr cun vallader
Quest onn èn 10 persunas in il palc per preschentar la cumedia «Che narramainta». Il toc en trais acts è vegnì scrit en putèr dad Anna Caprez. Cunquai che dus acturs èn da l’Engiadina Bassa, han els midà lur texts en vallader. La cumedia sa tracta d’ina clinica psichiatrica, nua che mintgin e mintgina ha in debel. Cura che visitas nunspetgadas vegnan annunziadas da la mamma d’ina clienta en la clinica, cumenzan ils scumbigls. A curta vista ston perquai ils cunabitants e las cunabitantas da la gruppa illa psichiatria empruvar, da’s deportar sco tut normala glieud.
Ina cumedia cun figuras simpaticas-sbatticoccas, nua ch’il public sa dumonda adina puspè: Tgi batta ussa en sasez ? E tge vul insumma dir normal?
Las datas da represchentaziun en la sala polivalenta a S-chanf èn mintgamai a las 20:00 h:
- venderdi, 31-01-2025
- sonda, 01-02-2025
- sonda, 08-02-2025
Derniera è la dumengia, 09-02-2025 a las 15:00 h!