En futur po mintgin e mintgina guardar las sessiuns dal Cussegl grond era online
La conferenza dals presidents vul crear in archiv audiovisual da las sesidas dal parlament. Quai en furma da video, cun tun original e cun translaziun en tut ils trais lungatgs chantunals. Ils intents principals èn la pussaivladad che è actualmain restrenschida per las persunas ordaifer la sessiun da persequitar las debattas en temp real. En pli duai il format esser pli viv, cumpareglià cun ils protocols en scrit. L' archiv duai er servir a la furmaziun ed a la perscrutaziun politica. Il project custass circa 58'000 francs per l' installaziun.
Sustegn per persunas ch'han long-Covid
Per las persunas ch’èn pertutgadas da long-Covid duai dar dapli sustegn en il Grischun. Ina incumbensa dal Cussegl grond pretenda ch’il chantun Grischun metta a disposiziun las resursas finanzialas ed il persunal. Suenter discussiuns da tuttas varts è l’incumbensa vegnida surdada – malgrà che la regenza ha appellà da refusar questa. La regenza na possa dar dapli sustegn, cun quai che i mancan persunas spezialisadas. En pli manassan dapli purschidas tar pli auts custs – pervia da quai duai dar soluziuns naziunalas. Questa incumbensa duai era esser in signal da sustegn per persunas pertutgadas. Tenor la WHO datti enfin 300'000 persunas ch’èn pertutgadas da Long–covid.
I duai dar in rapport davart dretgiras regiunalas
Il Cussegl grond vul optimar l’organisaziun da las dertgiras regiunalas. Perquai ha el surdà a la regenza l’incumbensa d’evaluar in rapport tar la situaziun actuala aifer in onn. En quest rapport duai era vegnir analisà en spezial il dumber da dretgiras regiunalas, las incumbensas ed il persunal. Il 2022 hai dà ina refurma giudiziala per reorganisar las dretgiras chantunalas superiuras. Tge che pertutga las dretgiras regiunalas n’ha hai betg dà grondas adattaziuns ils davos onns, malgrà novas sfidas sco dapli cass cumplex u la digitalisaziun.
Deponias decentrelas duessan vegnir promovidas
La regenza Grischuna duai sclerir sche las deponias en il chantun avessan dapli capacitads. I sa tracta surtut da deponias cun material da stgavament.Questa incumbensa ha il Cussegl grond surdat a la regenza, cun il intent da promover deponias en las regiuns. Actualmain vegnan duvradas deponias centralas – quai maina tenor deputads e deputadas dal Cussegl grond tar vias pli lungas, custs pli auts e dapli emissiuns da CO2. En pli duai la regenza examinar tge midadas en leschas chantunalas che fissan pussaivlas.
35 milliuns francs dapli per infrastructuras relevantas
Infrastructuras relevantas duessan er en avegnir vegnir sustegnidas dal chantun. Quai ha il Cussegl grond decidì mardi e surdat l’incumbensa a la regenza. Dapi il 2015 ha il chantun bajegià diversas infrastructuras cun in credit da 80 milliuns francs. Tranter auter il bogn cuvert ed albiert da giuventetgna a Laax u l’arena da biatlon a Lai. Uss è quest credit dentant duvrà si. Il Cussegl grond vul auzar il credit per 35 milliuns francs. Quest credit è dentant anc betg resguardà en il budget. Pervia da quai vegn il credit discutà en ina missiva separada en ina sessiun en la segunda mitad dal 2025.
Nizzegiar dapli terren per abitar
Il Cussegl grond vul schluccar la planisaziun dal territori. Tranter auter vai per las pussaivladads da bajegiar ordaifer la zona da bajegiar. Mardi ha il Cussegl grond surdà a la regenza l’incumbensa da stgaffir las cundiziuns planisatoricas e legalas per nizzegiar la lescha federala davart la planisaziun dal territori. Quella ha il parlament federal revedì il 2023. Uschia pudess il chantun per exempel pudair decider nua che bajetgs d’agricultura pon vegnir nizzegiads per abitar. Cura che l’incumbensa po vegnir realisada n’è anc betg cler. Bleras dumondas n’èn anc betg scleridas cun la Confederaziun.
Duas revisiuns èn vegnidas acceptadas unanimamain
La lescha chantunala davart protecziun da datas è sut tetg. Il Cussegl grond ha approvà la revisiun totala unanimamain. La lescha è en vigur dapi passa 20 onns – ed uss sto questa vegnir adatada al svilup tecnologic ed er a las reglas per la protecziun da datas sin nivel europeic. Cun la revisiun da la lescha datti expensas supplementaras – tranter auter dovra il chantun 1,5 plazzas cumpleinas dapli tar il post da surveglianza per la protecziun da datas che fin qua. La lescha duai ir en vigur il 2026.
En pli ha il Cussegl grond era ditg gea unanimamain a la revisiun parziala da la lescha d’impostas. Quella aveva da vegnir adattada a la lescha federala, midadas na datti betg grondas. Igl è ina adattaziun, e per quai n'è questa revisiun parziala betg ida en consultaziun. Las consequenzas finanzialas per il chantun e per las vischnancas sajan tras questas midadas minimas. Cun il gea dal Cussegl grond va la lescha en vigur retroactiv sin il prim da schaner 2025.
Il program
Famiglias da tgira
Il Cussegl grond è sa fatschenads cun la dumonda, sch'i dat insumma avunda famiglias da tgira en il Grischun. Il chantun Grischun cumbatta cun ina mancanza da famiglias d'accoglientscha per uffants plazzads ordaifer lur famiglia.
Tenor la regenza chantunala è il dumber d'uffants plazzads sa midà ils ultims onns. El è s'augmentà da 81 l'onn 2021 sin 105 l'onn 2022 ed è lura puspè sa sbassà sin 97 l'onn 2023. Actualmain vivan 70 uffants a lunga vista en famiglias d'accoglientscha grischunas.