Dapi ch'i na dat betg pli il post spezialisà per pazientas e pazients da long-Covid en l'Ospital chantunal vegnan quels pazients tramess vinavant. Els vegnan tgirads ensemen cun auters pazients en il post da «Fatigue». Qua vegnan tut ils pazients ensemen cun sintoms da stancladad e cun pauca energia. Il motiv per quest sintom è divers, el po vegnir chaschunà da grevas malsognas cronicas u esser ina part dals sintoms da long-Covid. Actualmain vegnan tgirads en il post da consultaziun da «Fatigue» var 250 fin 300 pazientas e pazients da long-Covid. Il manader da quest post Gregory Fretz di ch'il post saja in zic surchargià. Quai chaschunia temp da spetga da fin in mez onn per ina consultaziun.
I dovra persunas che mainan questa ura da consultaziun cun passiun.
Ina gronda sfida è da chattar persunal. Tar il tractament da persunas cun long-Covid sa tractia oravant tut d’accumpagnar e cussegliar. Questa cussegliaziun cumpiglia blers temas differents. En cas da long-Covid na datti dentant betg ina metoda concreta da curar. Da tegnair ora la situaziun sco persuna spezialisada ensemen cun il pazient na saja betg simpel. Pervia da quai èsi difficil da chattar persunal per quest post.
Silvia Bisculm Jörg è parlamentara ed ha gì inoltrà a la regenza ina dumonda che pretenda dapli sustegn per persunas cun long-Covid. Ella di ch'i manchian cifras concretas. Plinavant dovria dapli sustegn finanzial dal chantun. Era sin champ naziunal duessi capitar dapli.
Igl è enorm impurtant ch'ins s'engaschia e na spetgia betg tge che capita.
I dat però in problem: La diagnosa da long-Covid n'è betg definida exactamain, igl è plitost in'exclusiun d'autras malsognas. Uschia èn era las cifras mo stimaziuns e betg propi concretas. La regenza grischuna di, ch'ella na mettian betg a disposiziun dapli meds finanzials per la chaussa. Ella di ch'ils raps mancassan uschiglio tar rauba pli acuta. Plinavant manegia ella era ch'il long-Covid saja en sasez in problem naziunal che dovria soluziuns naziunalas.
