In local per consumar drogas duai far frunt a l’agressivitad ed a la criminalitad che stat en connex cun la scena da drogas a Cuira. Anc la stad 2022 aveva il parlament da Cuira concedì in credit da var 1 milliun francs per in local da consum.
Durant sviluppar quel project, saja dentant sa mussà ch’i custa dapli. Quai resulta dal messadi che la suprastanza scriva per mauns dal parlament da Cuira. Il motiv principal saja ch'i vegnia en il fratemp consumà autras drogas – surtut «base», ina sort cocain sintetic. E per quai dovri autras uras d’avertura ed uschia dapli custs da persunal.
Plinavant custa er l'immobiglia, la Sägenstrasse 75 nua ch’il local da consum vegn ad esser, tutga gia a la citad. Per midar enturn tar in local ston vegnir investids dapli raps sco sch’ins avess prendì a fit ina immobiglia sin il martgà liber. Er experientschas d'autras citads svizras mussan ch'il manaschi da tals locals saja pli char.
Dapi la primavaira 2022 saja la situaziun da drogas a Cuira pegiurada. Il dumber da persunas en la scena che passentan il temp en il parc da la citad ha cuntanschì in livel maximal. Medemamain è il dumber da delicts per acquistar s’augmentà. E la polizia aveva dapli intervenziuns sin annunzias da la populaziun. Tras il local da consum surveglià duai la scena averta da drogas a Cuira vegnir impedida fin ad in tschert punct. Quai surtut tras mesiras repressivas. Il parlament da Cuira decida en sia proxima sesida il prim da favrer co vinavant. La suprastanza dumonda al parlament da revocar il credit dad enfin uss, e da conceder in nov credit da 3,88 milliuns francs.
Or da l'archiv
Dapi ditg è in local da consumaziun – in uschenumnà «Fixerstübli» – en discussiun. En uschè in local pudessan persunas dependentas consumar sut cundiziuns pli controlladas ed igienicas. Il local na vegnia dentant er betg a schliar tut ils problems, uschia in'experta en chaussa.
