Per il polizist Dominig Bächtold èsi impurtant da far cler a la populaziun che betg mintgin ch'è dependent da drogas è automaticamein er criminal. La gronda part da las persunas che consumeschan drogas en il «Stadtpark» n'èn nagin privel per la populaziun. La polizia da citad fa las controllas savens er simplamain per avair il barat cun las persunas e guardar sch'ellas dovran agid u sustegn. Perquai collavura la polizia er cun diversas instituziuns sco l'agid sozial u era la «streetwork» da Cuira.
La polizia ha er gronda speronza en il local da consum che duai vegnir proxima stad. En quel local san dependents consumar drogas en in conturn protegì nua ch'igl ha er persunal medical. Che tut ils dependents svaneschan lura ora dal «Stadtpark» n'è betg realistic. La polizia da citad vul però reagir pli sever cunter la scena da drogas averta, subit ch'il local da consum è avert.