La regenza grischuna ha deliberà ina missiva per ina nova lescha per promover abitaziuns pajablas. Per l’onn 2026 duai vegnir integrà l’import da 2,5 milliuns francs en il preventiv meglierar las relaziuns d’abitar en il territori da muntogna. Ultra da quai duai la construcziun d’abitaziuns d’utilitad publica profitar da credits generals da plirs onns pli favuraivels.
La regenza grischuna ha communitgà da vulair sustegnair il svilup e las discussiuns areguard la stgarsezza e l’augment dals pretschs d’abitaziuns cun ina nova lescha. La situaziun sin il martgà d’abitaziuns è gia vegnida tematisada pliras giadas en il Cussegl grond. Quel aveva surdà duas incumbensas a la regenza per adattar la promoziun da la construcziun d’abitaziuns sco er per stgaffir la basa legala per promover emprimas abitaziuns pajablas.
Cun la nova lescha pon dad ina vart dapli persunas e famiglias dumandar per meds da promoziun per cumprar, construir u renovar in’abitaziun u ina chasa dad atgna proprietad. Per quai dessan las limitas d’entrada e da facultad vegnir auzadas e per l’autra augmentads ils meds da promoziun. Enstagl dad actualmain 1,3 milliuns per onn dess quest import vegnir augmentà sin 2 fin maximalmain 5 milliuns francs, scriva la Regenza en sia missiva. Per l’onn 2026 duai vegnir integrà l’import da 2,5 milliuns francs en il preventiv.
Tschains favuraivels
La segunda part da questa nova lescha per promover emprimas abitaziuns pajablas prevesa in instrument da promoziun direct tar la construcziun da talas abitaziuns. Il chantun vul sustegnair purtaders da chasas d’abitar d’utilitad publica, ch’èn organisads sco cooperativas, cun tschains favuraivels. Quests tschains pli bunmartgads vegnan cumplettads da la promoziun federala gia existenta. Sch’ils purtaders d’abitaziuns d’utilitad publica survegnan emprests a tschains moderads da la Confederaziun per construir, per cumprar e per renovar abitaziuns da locaziun favuraivlas, paja il chantun ina promoziun cumplementara da la medema autezza a las medemas premissas e cundiziuns. Plinavant pon vegnir pajadas contribuziuns à fonds perdu als purtaders d’abitaziuns d’utilitad publica per segirar l’agen chapital necessari. Quests imports correspundan a 2 % dals custs d’investiziun.
La finanziaziun concluda il Cussegl grond mintgamai sur credits d’impegn generals da plirs onns. Per ils emprests è previs – per ils emprims 10 onns – in credit da 15 milliuns francs en il senn d’in fond da rotaziun chantunal (vul dir ch’ils custs d’emprest en pli favuraivels ed ils emprests pon servir sco finanziaziun restanta u transitorica). Per las contribuziuns à fonds perdu duai star a disposiziun in credit da 4 milliuns francs. Il Cussegl grond fa quint da tractar questa nova lescha durant la sessiun dal zercladur.