Enfin uss han tschintg persunas chattà in’abitaziun grazia al sustegn da l’uniun Oase ed il sustegn finanzial dal chantun da 200’000 francs. Sper questas tschintg persunas che abiteschan uss en ina abitaziun datti ina glista da spetga da persunas che vulan era in tetg sur il tgau. Quantas che quai èn propi na sa la manadra da l’uniun Oase, Ilona Bosch dir. Per quai che questas 30 persunas na vegnan betg ad esser tuttas – ella va ora da ina uschenumnada cifra naira da persunas che n'èn betg identifitgadas sco persunas senza tetg. Ulteriur na vulan betg tuttas persunas il sustegn.
Memia paucas abitaziuns libras
Ma ina part dovra e vul ina abitaziun. Da chattar ina è dentant betg uschia simpel per l’uniun. Numnadamain na datti a Cuira bleras abitaziuns libras – la cifra d'abitaziuns libras è sut in pertschient. Cun ir a la tschertga d'abitaziuns ha l’uniun Oase spert sentì, che els tutgan sin refusaziun. Alura han els midà strategia ed uss surprenda l’uniun la responsabladad – quai dat segirezza a las administraziuns d’abitaziun e a las persunas privatas che dattan a fit. Per chattar avunda abitaziuns è la proposta da Ilona Bosch, che la citad Cuira metta a disposiziun las atgnas abitaziuns.
Tenor Patrik Degiacomi, il cusseglier da la citad, èn els avert per quai. Che i dat trais giadas uschè bleras persunas sco avant trais onns haja tenor el da far cun il consum da drogas – surtut pervia quellas che èn basadas sin cocain. En quest connex ins vesa in spert process da negligientscha e las persunas perdan il conturn, la lavur ed era l’abitaziun. En la regenza da Cuira vegnan examinadas duas opziuns: per l'ina questas abitaziuns d’urgenza cun la uniun Oase. Da l’autra vart da chattar ora sco evitar che persunas perdan insumma lur abitaziun. Sche il chantun Grischun vegn a bajegiar ora il project, alura fiss la citad pronta da metter a disposiziun abitaziuns.