Ils temas da la PLD
- Rinforzar l'economia e mantegnair plazzas da lavur: Cun dapli digitalisaziun e cun damain birocrazia vul la PLD cumbatter per la Svizra sco plazza economica dinamica. La perscrutaziun duai vegnir promovida cun uschè paucs scumonds sco pussibel. Per promover che las dunnas van dapli a lavurar, pretenda la PLD d'introducir l'imposiziun da taglia individuala.
- In provediment per la vegliadetgna persistent: La PLD s'engascha per il model da trais pitgas, tar il qual appartegna er il provediment privat. La PLD vul ina vegliadetgna da renta pli flexibla e sustegna perquai l' iniziativa da renta dals giuvens liberals.
- Per in provediment d'energia segir: la segirezza da provediment ha prioritad per la PLD. Ils liberals dovran en il sectur d'energia oravant tut il progress tecnologic ed impuls per ils pretschs. A medem temp s'exprima la PLD cunter scumonds, restricziuns e sforzs da spargnar per persunas privatas ed interpresas.
Sutga chauda cun la PLD
Sch'ins guarda sin la charta grischuna dominescha la PLD mo en paucas vischnancas. Co duai quai ir da defender il sez en il Cussegl naziunal?
Jon Fanzun: Nus essan en ina colliaziun da glistas cun l'Allianza dal Center, ed jau pens che quai sez è en buns mauns cun Anna Giacometti. Nus vain bunas glistas e bunas persunas, ed il Grischun elegia er persunas, betg mo partidas.
Avant quatter onns è la PLD anc siglida si l'unda verda cun Petra Gössi. Uss cun Thierry Burkhard a la testa na s'occupa ella pli cun quai. È la PLD in pau sco ina bandiera en il vent?
Jon Fanzun: Il cuntrari. Clima è er energia. Nus essan la partida che vul energia, e na vul betg scumonds da tecnologia. Per ils proxims onns stuain nus ponderar, tgeninas tecnologias che n'emettan betg CO2, e qua datti en il mument paucas variantas. Nossa partida è simplamain vegnida in pau pli realistica.
Sch'ins guarda sin il barometer da quitads, occupan per exempel las premias da cassas da malsauns. Politisais vus sper la glieud vi?
Jon Fanzun : Quai na crai jau betg. In quitad è l'economia. Ins po guardar en la Germania, ch'è pli u main en ina recessiun. En Svizra na sentin nus quai per cletg betg, mo igl è vinavant da gudagnar raps. Ed igl è in cusseglier federal da la PS ch'è il manader da l'Uffizi federal per sanadad publica, e las premias s'augmentan.
- è secretari general da la Partida liberaldemocratica svizra (PLD)
- è delegà naziunal per la PLD Grischun
- è stà collavuratur persunal dals cussegliers federals Didier Burkhalter ed Ignazio Cassis
- è naschì dal 1970
- è oriund da Tarasp ed abita a Berna
Situaziun da partenza
Ina tscherta euforia da l'entschatta da l'onn è puspè svanida. Ad elecziuns chantunalas ed en retschertgas ha la partida pers vuschs. Tuttina declera la direcziun da la partida, ch'ella veglia daventar la segund pli ferma partida.
Tops en la davosa legislatura
- Politica da rentas: Suenter bunamain 30 onns è ina refurma da l' AVS puspè ina giada gartegiada. La PLD ha furmà quella refurma, ed er la refurma da la cassa da pensiuns. Qua spetga dentant anc ina votaziun.
- Ferma dunna en il Cussegl federal: Cun Karin Keller-Sutter ha la partida ina ferma exponenta en il Cussegl federal, ch'ha gia pudì sa profilar sco managera da crisa.
Flops en la davosa legislatura
- En la politica da taglia ha la partida pers cunter la sanestra, cura ch'ella ha vulì abolir la taglia anticipada .
- Tar las elecziuns a Turitg ch'èn impurtantas per la partida n'ha ella betg pudì cumpensar la perdita d'avant quatter onns, ed era betg conquista in segund sez en la regenza chantunala.
La PLD grischuna
Era la PLD vala sco ina da las partidas cun schanzas realas sin il sez da la PS. I resta la dumonda sche l'anteriur cusseglier guvernativ Christian Rathgeb vegn a remplazzar la cussegliera naziunala Anna Giacometti.
E tge pensa la glieud sin via da la PLD?
Nus avain dumandà glieud sin via e politichers e politicras tge ch'els pensan da la PLD. Sin questas dumondas e pretensiuns ha lura Jon Fanzun dà resposta.
ChatGPT descriva la partida
L'intelligenza artificiala ChatGPT ha creà ina poesia sur da la Partida liberaldemocratica. Tge è la reacziun da Jon Fanzun sin questa ovra critica?
Scenaris fictivs sche la PLD survegniss tut ils sezs en il parlament
En il parlament federal sesan persunas da total 10 partidas. I vegn debattà, fatg dispitta e chattà cumpromiss. Tge fissi dentant, sch'ina partida avess tut ils sezs e pudess decider sulettamain? Co vesess la Svizra or, sch'ina partida realisass in ad in ses programm? Nus avain mess ensemen intgins scenaris fictivs ed in pau stravagads – che tutgan dentant ils puncts centrals dals programs da partida.
