Da principi datti mo tschintg sezs en il Cussegl naziunal per il Grischun. Candidaturas datti dentant avunda: 122, e cunquai uschè bleras sco anc mai. Tgi candidescha nua, e per tgenina partida? Qua la survista:
En Surselva è l'AdC tradiziunalmain represchentada fitg, dentant er la PPS è plitost ferma en la periferia ch'en la chapitala Cuira. Da las 122 candidaturas vegnan 22 da là.
Betg pli ina partida da purs
La PPS cun sias ragischs da partida d'agricultura, va cun quatter candidaturas cun professiun da pur en las elecziuns. Dentant anc dapli interprendidras ed interprendiders chatt'ins en lur glistas. E per las elecziuns ha ella mobilisà sia glieud en las chasas communalas u en il cussegl grond: 12 da 25 candidatas e candidats èn presidentas communalas u deputads en il Cussegl grond.
Tar la Partida verda han las persunas er da far professiunalmain cun l'ambient: 4 da 10 candidaturas han professiuns en il sectur d'ambient. E la Partida verd-liberala è ina partida da cader: 9 da 25 persunas èn interprendidras, mainaprojects u en auters posts da cader.
En las autras partidas na datti betg uschè ina clera colliaziun da partida e professiun. La maschaida tar PLD, PS ed AdC e gronda. Sulettamain tar las partidas pli pitschnas sco l'Uniun democratica federala pon ins anc discurrer d'ina tendenza: En la partida conservativa datti 3 purs (5 candidaturas en tut).
Vegliadetgna, schlattaina e dumber da candidaturas
Intginas persunas, sco Hans Vetsch (senza partida) ed Anna Giacometti èn duas giadas sin las glistas. Pia datti 122 persunas che candideschan en 25 glistas. Il nas davant han la PPS e la PVL cun mintgamai 25 persunas che candideschan.
En tut candideschan tenor la chanzlia chantunala 43 dunnas e 79 umens (ina quota da 35%). Ina sumeglianta proporziun datti sch'ins guarda sin la vegliadetgna. Là en 37% da las candidaturas da persunas sut 30.
Colliaziuns da glistas
Colliaziuns da glistas pon anc vegnir inoltradas. Fin uss datti ina colliaziun da glistas verd-sanestra (Allianza da clima) e burghaisa (tranter PLD e l'AdC).
Gia tar l'emprim termin, ils 22 da matg, èn 18 da las 25 glistas vegnidas inoltradas. Il termin per inoltrar ulteriuras canidaturas e glistas è scadì dapi il glindesdi ils 07-08-23.
Auter che tar il Cussegl naziunal na datti nagina procedura per inoltrar ina candidatura per il Cussegl dals chantuns. Là na vegnan ils sezs da Martin Schmid (PLD) e Stefan Engler (AdC) er betg contestads d'autras partidas.