Valentin Schmed, vice-schefredactur da RTR, èsi ina surpraisa che Christian Rathgeb vul ir en il Cussegl naziunal?
Na, il temp d’uffizi da Christian Rathgeb en la regenza grischuna va a fin la fin da l'onn ed igl è nagut extraordinari ch’in anteriur cusseglier guvernativ vul far il pass en la politica naziunala. Che Rathgeb motivescha e punctuescha dentant sia candidatura sco sustegn per la cussegliera naziunala e collega da partida, Anna Giacometti, fa schon surstar.
En tge senn surstar?
Christian Rathgeb ch'è dapi passa 10 onns en la regenza candidescha per il Cussegl naziunal per vegnir elegì e betg per purtar aua per la partida u per sustegnair insatgi auter. En quest senn valitesch jau questa candidatura era sco in affrunt envers Anna Giacometti. Quai mussa era ch’il sustegn da la partida per Anna Giacometti n’è betg enorm. I n’è betg in grond misteri che l’elecziun da Giacometti è stada ina surpraisa per la direcziun da la partida e ch’ella n’è betg stada la persuna che la direcziun vuleva trametter a Berna.
Tge motivs pudess la PLD avair, d’annunziar gia uss la candidatura da Rathgeb?
Per la partida vai cunzunt per mantegnair il sez, ch’ella ha reconquistà il 2019 cun Anna Giacometti. Puspè perder quest sez fiss ina gronda terrada per la PLD grischuna (quai ch’è dal reminent capità 2011 cura che Tarzisius Caviezel n’è betg vegnì reelegì). Cun Christian Rathgeb ha la PLD in candidat fitg enconuschent, ch’enconuscha fitg bain ils basegns dal Grischun e ch'è in garant per in bun resultat. Dentant metta questa candidatura en la sumbriva la persuna da Giacometti. E che la candidatura da Rathgeb vegn publica uss, in onn avant las elecziuns naziunalas, e betg tar ina preschentaziun uffiziala dals candidats da la PLD, quai ma dat il sentiment ch’ils responsabels da la partida èn leds e cuntents d’avair a disposiziun in candidat profilà e prendan uschia era en cumpra da laschar crudar ina candidata en uffizi.
Anna Giacometti n’ha sin dumonda da RTR betg vulì prender posiziun oz. Tge munta quai uss per ella?
Anna Giacometti è per franc conscienta da la ferma concurrenza interna ed era da la moda e maniera da sia partida, ch’annunzia uss tuttenina la candidatura da Rathgeb in zic or dal blau. I vegn interessant da persequitar co la partida s’inschigna ils proxims mais. Datti ina glista communabla cun Giacometti e Rathgeb? Datti duas glistas, ina cun Rathgeb ed ina cun Giacometti? Quant grond è il sustegn da la partida per Giacometti? Tut dumondas che vegnan a fatschentar ils strategs da la partida ils proxims mais. A mai persunalmain dat questa acziun il sentiment che la PLD grischuna vegnia dirigida fitg ferm da la secziun da Cuira senza guardar bler dretg e sanester.
Valentin Schmed
Manader programmaziun RTR
