La Confederaziun e la Banca naziunala svizra (SNB) avevan il mars concedì garanzias a l'UBS per ch'ella surpiglia la CS. Uss ha l'UBS terminà il contract. Pia na datti per las persunas che pajan taglia en Svizra naginas ristgas pli en connex cun la surpigliada da la Credit Suisse sfurzada, di la manadra dal Departament da finanzas Karin Keller-Suter.
Il stadi svizzer avess fin uss surpiglià perditas fin a 9 milliardas francs en connex cun la surpigliada da la Credit Suisse. Ulteriur agid da liquiditad (maximalmain 100 milliardas francs) tras la Banca naziunala svizra na dovra l'UBS betg pli. I saja ina decisiun voluntaria da l'UBS, ma «absolutamain en l'interess da la Svizra», di Keller-Suter.
UBS ha duvrà 70 milliardas francs da la banca naziunala
Da l'agid da liquiditad ha l'UBS duvrà 70 milliardas francs, «relativamain bler», di Keller-Suter ad ina conferenza da medias venderdi. Quels daners èn tenor la banca naziunala gia pajads enavos. In'ulteriur credit da la banca naziunala da 50 milliardas francs haja l'UBS pajà enavos, tenor atgnas indicaziuns.
Tuttina duai dar pass politics
Il Departament da finanzas ha scrit ch'el vegnia a proponer al parlament ina basa legala per il «Public Liquidity Backstop», sco che l'UBS ha duvrà. Il dretg d'urgenza saja en mintga cas stà necessari, di Keller-Suter. «Mintg'autra schliaziun avess basegnà dretg d'urgenza il mars, e mintg'autra schliaziun avess basegnà garanzias da liquiditad.»
Ella saja dentant leda ch'il stadi n'haja betg pli ristgas en connex cun la surpigliada da la Credit Suisse tras l'UBS. Ella valitescha la crisa da la Credit Suisse dentant sco crisa interna da la banca, e betg sco crisa da sistem. «Bun cumportament na pon ins betg regular», di Keller-Suter.
Analist e l'UBS valiteschan quai sco pass positiv
Tenor il CEO da l'UBS Sergio Ermotti èsi in mussament da la fermezza da l'UBS ch'ella ha terminà il contract. Tras quel ha l'UBS era stuì pajar premias, en connex cun l'agid da liquiditad sajan quai stà 576 milliuns francs, en connex cun las garanzias da perdita ulteriuras 200 milliuns francs.
In analist da la banca svizra Vontobel prognostitgescha che quai vegnia a calmar la debatta davart il privel tras la grondezza da l'UBS, ch'è vegnida fitg ferma sin il martga svizzer tras la surpigliada. El schazegia che la banca saja sin buna via, era perquai ch'il cas d'Archegos saja schlià dapi il fanadur . Dapli cleritad vegnian las cifras dal segund quartal che vegnan la fin d'avust a purtar.
AdC e Verds cuntents, PPS è critica
La politica reagescha a moda differenta sin il rembursament dals agids finanzials da l’UBS. Positiv chatta quai l’Allianza dal Center. Sin Twitter scriva ella ch’ins stoppia uss evitar che la Svizra stoppia en il futur puspè salvar ina banca. Era ils Verds èn cuntents. Els sa dumondan però sche la CS avess pudì vegnir salvada era differentamain. Il president da la fracziun da la PPS, Thomas Aeschi, di che la situaziun finanziala da la Credit Suisse è para stada bler meglra che mussà. Perquai saja il Na da la PPS als credits per l’UBS era stà correct.
