Omadus vegnan proponids u elegids da la Regenza. Omadus survegnan annualmain enturn 200'000 francs per lur presidis. Per in da quests mandats vegn però pretendì ina «relaziun persunala cun il Grischun». L’auter mandat vegn occupà senza ch’ina tala fiss dada.
La FMR ha vulì savair pertge? I sa tracta gea da dus impurtants mandats per l’economia grischuna: il presidi da Repower ed il presidi da la Banca Chantunala Grischuna.
Tge che vala per Monika Krüsi …
Monika Krüsi presidiescha dapi set onns il cussegl d’administraziun da Repower. Avant duas emnas vegn la surpraisa: La Regenza dat enconuschent ch’ella na nomineschia betg pli Krüsi. La tempra grischuna a la testa da la pli gronda ed unica interpresa d’energia grischuna duaja vegnir rinforzada, scriva la Regenza. Pervi da questa nova orientaziun na saja quai betg pussaivel da nominar la presidenta actuala per ina ulteriura perioda d’uffizi.
Uss è scrit ora il post sin il portal da plazzas dal Chantun. Tgi che ha interess e qualificaziuns, po s’annunziar. Circa trenta dis ad onn èsi d’impunder per il mandat. Il salari na vegn betg numnà, ma el resorta dal rapport annual da Repower. Il 2023 èsi stà 196'000 francs. Tenor inserat vegn pretendida «ina relaziun persunala cun il Grischun ed enconuschientschas da las relaziuns en il chantun». Talas n’ha Monika Krüsi tenor la Regenza pia betg.
… na vala betg per Heinz Huber
Tge che vala per Monika Krüsi, na vala betg exnum per il futur president da la Banca Chantunala Grischuna. Il december, gnanc in mais avant ch’igl è vegnì communitgà che Krüsi sto ir, vegn enconuschent: «La Regenza grischuna ha elegì Heinz Huber sco nov president da la Banca Chantunala Grischuna.»
Heinz Huber ni abitescha ni è creschì si en il Grischun. El ha be ina abitaziun da vacanzas en il chantun. Na proceda la Regenza forsa betg a moda eguala tar ils dus mandats?
«La relaziun cun il Grischun è era stada in impurtant criteri tar l’occupaziun dal presidi da la Banca Chantunala Grischuna», respunda cusseglier guvernativ Martin Bühler en scrit a la FMR. En l’inserat da l’atun passà saja gliez stà formulà uschia: «Bunas enconuschientschas da las relaziuns chantunalas, politicas ed economicas, en il cas ideal ina relaziun persunala cun il chantun Grischun ed esser bun da sa colliar a moda engaschada sin plaun regiunal.»
FINMA tschenta era pretensiuns
Ils dus presidis – banca e Repower – sajan da differenziar, sutlingescha Martin Bühler. Tar il presidi da banca sajan da resguardar las prescripziuns da la FINMA, la surveglianza federala dals martgads da finanzas. Lezza stoppia confermar l’elecziun. Era sch’ina relaziun cun il chantun saja in criteri impurtant, decisiv saja la fin finala ina vista generala. «La Regenza ha tschertgà la persuna la pli bain qualifitgada», scriva il cusseglier guvernativ. Cun Heinz Huber hajan ins chattà quella.
Heinz Huber ha lavurà dudesch onns tar la Banca chantunala turgoviana, tranter auter sco schef da banca. Suenter è el stà sis onns schef da la banca Raiffeisen, la segund gronda banca da la Svizra. La stad mida el pia en il presidi da la Banca Chantunala Grischuna. Sia indemnisaziun annuala vegn ad esser pli u main sco quella da Peter Fanconi. Il president actual ha survegnì il 2023 indemnisaziuns da 248'000 francs.
Giavisch dals gronds acziunaris
Il presidi da Repower vegn elegì dals acziunaris che sa radunan mintgamai il matg. La Regenza na po pia betg eleger – ma proponer la persuna per il presidi. Cussegliera guvernativa Carmelia Maissen scriva sin dumonda da la FMR che «la Regenza suttametta a la radunanza generala ina proposta per occupar da nov il presidi dal cussegl d’administraziun». La proposta succedia suenter ina publicaziun da la plazza e suenter ina procedura d’examinaziun.
Sco gia menziunà è in dals criteris «ina relaziun persunala cun il Grischun». N’è ina tala betg stada pretendida il 2018 cura che la presidenta actuala è vegnida elegida per l’emprima giada? «Na, tar l’elecziun da dunna Krüsi era questa procedura anc ida sur la Repower», respunda Carmelia Maissen. Vul dir: La proposta è vegnida fatga dal concern d’energia.
Sto la futura presidenta u il futur president da Repower abitar en il Grischun? «Na», respunda la ministra d’energia, «ma il nov cussegl d’administraziun sto avair ina relaziun persunala cun il Grischun ed enconuschientschas da las relaziuns chantunalas.» I Ovras saja il giavisch dals acziunaris da tschep da rinforzar la caracteristica grischuna a la testa dal concern d’energia. Tar ils acziunaris da tschep tutgan sper il chantun Grischun era las electricas dal chantun Turitg e dus fonds da la UBS.