Il chantun Grischun è sin buna via d'avair la maioritad tar la Repower ensemen cun dus fonds svizzers d'infrastructura d'energia, scriva la regenza grischuna en ina communicaziun. Il chantun ed ils dus fonds possedian ensemen pli che 50% dals dretgs da votar da la Repower SA e vulan duvrar en l'avegnir questas vuschs a moda coordinada, hai num vinavant. Uss manchia sulet anc la glisch verda da las autoritads da concurrenza, la Weko. Areguard la terza partida d'acziunaris, las Ovras electricas dal chantun Turitg scriva il chantun da vulair mantegnair cun quellas ina relaziun amicabla.
Perspectiva a lunga vista
Cun quest pass da concentrar ils dretgs da vuschar tar la Repower persequiteschia la regenza la strategia da forza idraulica da 2022-2050 ch'il Cussegl grond ha decis. Ina da las finamiras en questa strategia saja da rinforzar la posiziun dal chantun a las vischnancas grischunas en l'acziunariat da la Repower, argumentescha la regenza.
