Tge influenza hai sin ils pretschs d’electricitad sch'adina dapli navs – che transportan gas liquid – van da l’America en l'Asia e betg pli en l'Europa? U cura lieuan las grondas quantitads da naiv sin las muntognas che vegnan ad emplenir ils lais d’accumulaziun? Quai èn be dus d'ina massa facturs che decidan davart la dumonda cura producir e vender electricitad u cumprar ella.
Poschiavo è pia in lieu nua che milliuns da francs vegnan transferids per l’Europa enturn ed er decisiv per l’entir chantun Grischun che posseda 27% da las aczias da Repower.
Pretschs negativs tar la Repower
I n’è anc betg uschè ditg enavos che la Svizra temeva da crudar en ina mancanza d’energia. Avant stgars dus onns èn ils pretschs d'energia ids en sferas astronomicas. Quests dis è capità precis il cuntrari. Per l’emprima giada hai dà ina fin d’emna cun ina surproducziun d’energia electrica e pretschs negativs. Quai munta che las ovras d’electricitad han stuì pajar daners per pudair vegnir davent cun lur electricitad.
Capità è quai d'ina vart pervia da dapli energias regenerablas en Europa. Mintga di vegnan per exempel montads novs moduls solars – ed uschia crescha era la producziun. Plinavant vegn las fin d'emnas duvrà e consumà pli pauca energia. Quai chaschuna uschia ils pretschs pli bass ubain schizunt negativs. Pretschs bass valan er in pau sco «barometer» per energias regenerablas – dapli energias regenerablas vul dir pretschs pli favuraivels.
Tariffa da notg: in sistem antiquà
Dal rest: Bleras persunas guardan da consumar surtut la notg blera energia, per pudair profitar da la tariffa da notg. Quai è dentant in sistem antiquà. Per propi pudair profitar da las tariffas bunmartgadas dovri ina sort quintader dal current electric intelligent. Quels derasan il consum d'energia sur tut las chasadas uschia ch'i va parallel cun la producziun. Derasads èn quels per exempel en l'Italia – en Svizra vegnan els pir ils proxims onns.
