Peter Fanconi era 11 onns en l'uffizi da president da banca. Durant ses temp haja la banca pudì optimar adina puspè ses model da fatschenta ed era vegnir a gudogns da record.
A la fin èsi da ponderar cura ch'il mument è perfetg per chalar – betg per mai, mabain per la banca.
Sia demissiun va a prà cun il ciclus strategic da la banca. Er quel cuzza fin il 2025. Er possia la regenza grischuna uschia tschertgar ina schliaziun adattada. Davart la successiun da Fanconi n'ha la Banca Chantunala Grischuna anc fatg naginas indicaziuns.
L'onn ha cumenzà fitg bain e nus avain fin ussa pudì surpassar las aspectativas.
Critica pervi da colliaziuns cun Benko
Il davos temp steva il president da banca en la critica. La Banca Chantunala Grischuna aveva instradà in’examinaziun externa en connex cun il cas da l’investider austriac René Benko e ses concern d’immobiglias Signa ch’era collabà. En il focus stevan la dumonda sche la banca haja concedì credits problematics ed er sch'il president dal cussegl da banca Peter Fanconi è stà involvà. Fanconi haja er avert a Benko las portas per credits tar autras bancas chantunalas.
Fanconi aveva adina dementì tut las rinfatschas. E da colliar contacts saja a la fin er ina da sias incumbensas sco president da banca. El era dentant sa perstgisà che la banca chantunala è vegnida tratga en questa istorgia.
In rapport da la firma Ernst & Young – dal rest: er ils revisurs da la GKB – vegniva a la conclusiun che Fanconi n'haja fatg nagut fauss. Er la regenza grischuna aveva prendì per enconuschientscha quai – aveva dentant constatà basegn d'agir tar il sectur da decleraziun e conflicts d'interess. La regenza aveva annunzià dad examinar la situaziun e da tschertgar schliaziuns cun la GKB. Quai possia dentant cuzzar in mument.
La fracziun da la PPS dal Cussegl grond n'è dentant betg sa mussada cuntenta. Ella spetga da la regenza ch'ella prendia sut la marella pli en detagl l'agir da Fanconi e sias colliaziuns cun René Benko. Er davart l'independenza dal rapport hai dà critica.
RTR: Suenter indesch onns en uffizi sco president da la Banca Chantunala Grischuna avais Vus communitgà Vossa demissiun. In zichel surprendent, gia sin la fin da schaner da quest onn che vegn, enstagl pir sin la fin da la perioda d’uffizi che fiss la fin da mars 2026. Pertge quai?
Peter Fanconi: Mia demissiun n’è betg ina surpraisa. I fa senn da communitgar ina tala decisiun in pèr mais avant, ed ussa cun la communicaziun dal resultat semestril eri il gist il mument. Cunquai che las bancas lavuran adina en uschè numnads ciclus da strategia, è quai gist bun, sche mes successur u mia successura ha er in schanza dad elavurar la strategia per il proxim ciclus e na sto betg surprender quai che jau hai anc planisà. Quella persuna duess pudair instradar sia atgna strategia.
Tge èn lura stads Voss motivs persunals per la demissiun?
Jau sun ussa stà bundant diesch onns en questa posiziun. Quai che quinta per mai è il bainstar da la banca. La fin finala ston ins percorscher cura ch’igl è il dretg mument dad ir. Betg mo per mai, mabain per che l’istorgia da success da la banca possia cuntinuar. Jau hai natiralmain adina puspè discurrì sur da quest tema, era cun mes collegas.
Quai vul dir, che Vus essas As fatschentads gia daditg cun la dumonda da la demissiun?
Natiralmain, quai ponderesch’ins gia da ditg. Quai è ina da las lezias centralas da ponderar co ch’ins maina in affar e tgi che pudess surprender la successiun. Quai è in tema che m’ha occupà gia plirs onns e che jau hai adina puspè discutà cun mes collegas, ma era cun la regenza e cun il cussegl da banca. E tuttenina vegn ins a la conclusiun ch’igl è uss il mument perfetg.
Tenor la bilantscha semestrila avais Vus gì tut en tut in davos mez onn da success – co guarda quai ora per il proxim semester – tge finamira avais Vus anc?
L’emprim mez onn ha effectivamain cumenzà fitg bain. Nus avain perfin pudì surpassar las aspectativas. Ussa sperain nus che nus prendian quest schlantsch era vi en il segund mez onn. Per che nus possian puspè arrivar sin quel nivel, sco quai che nus eran l’onn passà. Mias finamiras per ils proxims diesch mais èn segir da pudair lavurar tut normal vinavant fin l’ultim di. E natiralmain da far il meglier per la banca. E cler, ina lavur è era da chattar e segirar mia successiun, quai fatsch jau ensemen cun la regenza.
Tge tegnais Vus endament suenter quests ultims indesch onns en l’uffizi?
Tut be positiv, uschiglio n’avess jau betg gì indesch onns quest post. Sche la banca po avair in tal success – ed jau dastg dir ch’ella è oz ina da las bancas cun il pli grond success en Svizra – nus avain ils custs sut controlla, nus avain diversifitgà fitg bain, nus essan ina banca moderna, lura ma fa quai ensemen cun tut quels che lavuran qua, en mintga cas superbi.
Sch’ins vesa bancas che han grond success, ha quai savens era da far cun gronds ristgs. Sco gist vis ultimamain cun ils affars da Signa. Co giais Vus enturn cun quests ristgs?
La fatschenta da la banca è la fin finala ina fatschenta da risico, cunzunt sch’ins dat credits. Quai vul dir ch’ils emploiads da las bancas ston adina puspè considerar en tge ristgs ch’i vala dad entrar e far in gudogn, e tge ch’ins ha sut controlla ed tge affars da risico ch’ins guntgescha meglier. E quai fa la Banca Chantunala Grischuna magari bain. Quai avain nus era cumprovà gist en quest cas.
Lain restar tar quest cas da Signa – è la critica che Vus avais survegnì pertutgant quest cas era stada in motiv per Vossa demissiun?
Na, quest cas è cumplettamain serrà giu. Quai è stà avant trais, quatter mais ch’igl è buglì si, ma quai è en sasez tut normal en noss affar. Nua ch’i vegn lavurà, datti mintgatant era in pèr sbrinzlas. Ma cun quai sai jau ir enturn. Nus avain gì in’expertisa externa che ha intercurì quest cas ed ha dà scleriment ed era la regenza ha attestà che quai è tut serrà giu e finì sco ch’i tutga. Per mai è propi il ciclus da strategia da la banca il motiv da mia demissiun. Ed ussa vali anc da chattar ina successiun valabla per la Banca Chantunala Grischuna.
Or da l'archiv
