Situaziuns u chaussas ch'èn per persunas senza impediments il pli normal dal mund, sco per exempel traversar la via ubain emplenir ora ils cedels da votar, pon esser per persunas cun impediments ina vaira sfida. Anc adina ina sfida è il dretg da pudair viver uschè autonom sco pussaivel. En blers secturs dal mintgadi na sa chapescha quai anc betg da sasez per persunas cun impediments, per exempel el traffic public. Schegea che Reto Crameri, il president da Procap Grischun, la pli gronda uniun Grischuna che s’engascha per ils basegns da persunas cun impediments, è tut cuntent cun la situaziun d'egualitad en il cantun, datti anc bler da far.
Nus n'essan anc betg là, nua che nus stuessan esser e nua che nus vulessan esser.
Investiziuns en il traffic public
Cunzunt tar l'accessibilitad dal traffic public dettia anc intginas sfidas. Uschia n'èn per exempel anc adina betg tuttas staziuns da tren da la Viafier retica construidas tenor ils basegns da persunas cun impediments. Ed era diversas fermadas da bus stoppian vegnir reconstruidas. Ils pli gronds projects sajan per exempel la staziun principala d’auto da posta a Cuira u era la staziun da bus a Tusaun. E qua dettia nagina discussiun, quellas stoppian vegnir fatgas, uschia Reto Crameri.
La charta quasut mussa il stan actual da las staziuns da tren da la Viafier retica. 50 staziuns èn bajegiadas enturn per ils basegns da persunas cun in impediment – 54 staziuns ston anc vegnir fatgas.
Dretg da vuschar per persunas che dovran sustegn
In'autra tematica è il dretg da vuschar per persunas che dovran sustegn, là possia il chantun Grischun prender in exempel vi dal chantun Appenzell Dadora. Lez ha gia introducì l’onn 2013 – pia schizunt avant il chantun Turitg – il dretg da vuschar per persunas che dovran sustegn, sche quellas hajan era l'abilitad da giuditgar. Vinavant giavischa Reto Crameri, president da Procap Grischun, ch'il chantun sustegnessi finanzialmain pli ferm lur lavur da cussegliaziun.
...perquai che tut las persunas che nus cussegliain, na sa tschentan a la fin betg en l'agid social. Perquai èsi impurtant che l'indemnisaziun per la cussegliaziun constat.
En general stoppia la sensibilitad davart la tematica d'inclusiun anc crescher entaifer la politica grischuna. E betg mo entaifer la politica, era la societad stoppia vegnir sensibilisada.
E perquai saja il di internaziunal da persunas cun impediments fitg impurtant per Reto Crameri e tut las persunas involvidas en l'uniun da Procap Grischun. In di nua ch'ins possia puspè far attent dals basegns da persunas cun impediments e che l'egualitad en il mintgadi saja anc betg dal tut cuntanschida e per quella vali da cumbatter – e quai mintgadi.
Or da l'archiv:
Co resentan persunas cun impediments il mintgadi, tge patratgs van tras il chau e tge siemis han ellas? RTR ha rapportà quest onn davart persunas cun impediments: