Dapi l'onn 2004 stuessan chasas ed abitaziuns novas esser accessiblas per sutgas cun rodas. E dapi il 2019 stuessan era las abitaziuns sezzas vegnir bajegiadas lasuenter. Quai vala tenor lescha per tut ils bajetgs e tut las chasas d'abitar cun passa quatter abitaziuns.
Las autoritads da vischnanca èn dumandadas per chattar soluziuns.
Tenor l’architect Roman Brazerol dal post da cussegliaziun «Bajegiar senza obstachels» da la Pro Infirmis Grischun sajan gia 80% cuntanschì, sch’ins arriva enfin l’entrada da la chasa senza obstachels. En l'abitaziun sezza saja impurtant che la duscha è gronda avunda, che la cuschina è adattada per ina persuna en sutga da roda, ch’ina chombra funcziuna e che las portas sajan ladas avunda.
Problems en il Grischun vesa Roman Brazerol tar la cifra d’utilisaziun cunzunt en spundas taissas pervia da l’autezza da la chasa. Uschia ha el gia fatg l’experientscha che l’access tar la chasa aveva obstachels. Qua èn las autoritads da vischnanca dumandadas per chattar soluziuns.
Umans cun in impediment pon sa participar a la vita sociala pir cura ch'ils obstachels da construcziun èn eliminads.
Deficits en connex cun il traffic public vesa Reto Brazerol cunzunt en la periferia. A Cuira è l’infrastructura adattada als basegns da persunas cun impediments, ma pli lunsch davent da Cuira èsi pli grev da duvrar il traffic public cun in impediment.
Tge edifizis ed implants èn accessibels senza obstachels?
Pli lunsch davent da Cuira e mender ch’igl è.