Durant in mais han lieu en l'entira Svizra passa 1'000 occurrenzas. En il Grischun èn quai passa 40. Sin il program stattan per exempel preschentaziuns d'interpresas e fundaziuns che sa fatschentan cun ils obstachels per persunas cun impediments. Era mussà vegn co ch'igl è da viver cun in impediment, per exempel porscha il Museum retic la chaschun da far experientschas co ch'igl è senza vesair insatge.
Bleras occurrenzas porschan a persunas cun impediment la chaschun da sa participar ad acziuns che n'èn uschiglio betg pussaivlas, per exempel dar tennis u far in viadi cun charrotscha da chavals. Persunas tschorvas pon per exempel ir a viagiar sin la senda da stgilats ad Arosa. E bler auter.
Chalender da las occurrenzas en il Grischun
Promover e sensibilisar
La finamira dals dis d’acziun saja da mussar a la vasta populaziun, co ch’il futur inclusiv possia sa preschentar e vegnir realisà en differents secturs da la vita, scriva il chantun Grischun. Cun differents temas, sco per exempel l’access al sport ed a la cultura, l’inclusiun en il turissem, en la furmaziun u en la lavur, duai vegnir promovida la sensibilisaziun dals uffants e da las persunas creschidas
Anniversari da 10 respectivamain 20 onns
L’onn 2024 è in onn impurtant per ils dretgs da las persunas cun impediments en Svizra. Da festivar datti gist dus terms impurtants sin la via a l’inclusiun da las persunas cun impediments.
La Convenziun da l’ONU davart ils dretgs da las persunas cun impediments è en vigur en Svizra dapi l’onn 2014. La lescha davart l’egualitad da persunas cun impediments è gia dapi il 2004 ina basa giuridica impurtanta. L’intent da la convenziun e la lescha è quel da promover, da proteger e da garantir il giudiment egual dals dretgs umans e da las libertads fundamentalas per tut las persunas cun impediments sco era da promover il respect da lur dignitad. La Confederaziun, ils chantuns e las vischnancas èn obligads da realisar quellas.
RTR live al lieu
RTR deditgescha dus dis tematics al tema dals dretgs da persunas cun impediments. Ils 28 da matg emetta RTR live da l'Argo a Glion ed ils 30 da matg emetta RTR live da Movimento a Scuol. Per tuttas duas emissiuns collavurescha RTR cun persunas cun impediments.
Laschar vegnir a pled
Il format dal podcast da tschantscherlar è in format cumprovà per dar invistas en la vita privata da persunas publicas. Persunas cun impediments vegnan en la gronda part dals podcasts interrogadas principalmain davart lur impediments e las restricziuns che resultan tras quels.
Quai ch'occupa els en lur mintgadi, quai che fascinescha els e quai ch'agita u tutga els na survegn percunter per il pli betg tanta attenziun. Ensemen cun Marcus Petendi elavuran las collavuraturas ed ils collavuraturs d'in lavuratori per persunas cun impediments lur agen podcast davart temas ch’als occupeschan.
Medemamain èn persunas cun impediment vegnids a pled en la seria da video «Co vai?». Co resentan ellas il mintgadi, tge patratgs van tras il chau e tge siemis han ellas?
