Ils plans da la Viafier retica - La staziun da Zuoz duai far il pass en l'avegnir

La Viafier retica duai renovar tut sias staziuns da tren, surtut per adattar quellas als basegns da persunas cun impediment. Fin uss en be 50 da las 104 staziuns cumplettadas. Uss duai Zuoz vegnir vidlonder. Durant la radunanza communala ha la  Viafier retica preschentà il project da renovaziun ed embelliment da l'areal.

Project per divers milliuns

Il project cumpiglia la renovaziun da la chasa existenta, vitiers duain ils perruns vegnir fabritgads da nov. Era in nov sutpassadi dals dus binaris è planisà, per colliar meglier il quartier sut la staziun e per cuntanscher il perrun da l’autra vart. Tut en tut duai il project vegnir a custar bundant 24,5 milliuns francs. La Viafier retica vul cumenzar a bajegiar l'avrigl 2025, ed a fin duai il project esser dus onns e mez pli tard. Quai pero be sche tut va tenor plan e las concessiuns necessarias èn avant maun fin là.

Ulteriuras decisiuns communalas

Ils 75 votants e votantas da Zuoz preschents quella saira han er anc tratg ulteriuras decisiuns. Il preventiv 2025 prevesa in deficit da 970’000 francs ed investiziuns nettas da pli che 7,8 milliuns francs. Il preventiv ha la radunanza approvà unanimamain.

Era la dumonda per credits supplementars per ils onns 2024 e 2025 da la fundaziun provediment da sanadad Engiadin’Ota (SGO) da 234’000 francs per onn è vegnida discutada. Per l’onn 2024 è il credit vegni approvà. Per quel dal 2025 però n’ha la radunanza betg vuschà. Da questa dumonda vuless il suveran da Zuoz pir vuschar a chaschun d'ina radunanza communala da l'onn che vegn, cura che dapli detagls en chaussa èn conuschents.  Ils credits èn necessaris per segirar la liquiditad da la gestiun da la fundaziun fin che la strategia da l’avegnir è elavurada e deliberada.