La notg passada è capità quai ch'experts e la populaziun da Brinzauls e conturn spetgavan gia dapi in temp. Curt suenter las 23:00 ha la fasa blaua cumenzà. En consequenza ha er Clara Farrér-Pazeller ch'abita a Surava stuì bandunar sia chasa, perquai che quella sa chatta en la zona periclitada. Che quai possia capitar saveva ella gia daditg, uschia ch'ella era preparada.
Cun ses um è ella ida sin l'acla sur Surava. Ella n'haja betg vesì tge che capitava, be udì il ramplunim fin las duas. Quai saja stà sgarschaivel da betg savair sche Brinzauls saja vegnì sutterrà. Ma las glischs a Brinzauls han els vesì, lura saja ella stada quietada.
Cunquai che la fasa blaua è terminada e la fasa cotschna vala dastgan Clara Farrér-Pazeller e ses um sco er ils auters evacuads a Surava turnar en lur dachasa.