Suenter che la populaziun da Scuol aveva ditg cun 52% Gea a l’idea da Scuol Solar si «Sur Bos-cha», ha la gruppa enturn Chasper Alexander Felix lavurà davos las culissas vi dal project. La dumonda da construcziun è anc pendenta, ils responsabels quintan cun ina resposta quest october. Suenter han las organisaziuns per l’ambient temp 30 dis per far recurs encunter il project. Anc il cumenzament da l'onn quintavan ils responsabels cun il permiss da construcziun fin l'avust.
Pli pitschen, ma rentabel
Sco ch’il manader dal project ha declerà, hajan gì lieu numerus inscunters cun organisaziuns per sclerir differentas dumondas, tranter auter areguard la geologia. Entant è planisà in implant solar sin ina surfatscha da 46 hectaras cun ina producziun da 40 uras gigawatt l’onn. Quai correspundia a forza electrica per var 10'000 chasadas. Actualmain fan ins quint cun investiziuns da 120 milliuns francs per il project.
En la varianta actuala è il project gia vegnì duas giadas pli pitschen:
- Emprima varianta: 77 hectaras ed ina producziun da 60 uras gigawatt
- Segunda varianta: 57 hectaras ed ina producziun da 48 uras gigawatt
- Terza varianta (actuala): 46 hectaras ed ina prestaziun da 40 uras gigawatt
Ils custs fixs restan, independent da la grondezza. Nus essan dentant cun 46 hectaras anc en in rom che cumporta ina tala reducziun.
Scuol Solar saja actualmain en tractativas cun pussiblas interpresas ch’investissan en il project. L’interess saja grond e per part er gia fitg concret, uschia Chasper Alexander Felix.
Da pudair accumplir las premissas da la Confederaziun per ch'ella surpigliass 60% dals custs, quai daventia adina pli illusoric. Fin la fin dal 2025 avessan 10 % dal project solar dad esser en funcziun. Tenor Felix spetgian ins che la politica curregia anc quella limita da temp.
Sche tut avess dad ir tenor plan, vuless las Scuol Solar cumenzar la proxima primavaira cun l’emprima etappa. L'entir implant solar avess dad esser pront il 2029/2030.
Dretgira administrativa ha refusà in recurs
Il mars 2024 ha la vischnanca communitgà che la Dretgira administrativa dal Grischun ha refusà la fin 2023 in recurs cunter l'andament da la procedura d'ina radunanza communala en chaussa l'avust 2023. Ils recurrents han lura decis da betg trair vinavant la sentenzia uschia ch'il recurs è stà giud maisa.
