Sco che la vischnanca da Scuol ha annunzià il mars 2024, ha la Dretgira administrativa grischuna refusà il recurs en connex cun il project fotovoltaic Scuol Solar. Plinavant na vegn quel era betg tratg vinavant en la proxima instanza. Ils responsabels dal project fotovoltaic en l'Engiadina Bassa èn vi dad optimar e finalisar il project e speran da survegnir il permiss da fabrica questa stad.
Suenter che Scuol Solar aveva inoltrà la dumonda da fabrica il november 2023, èsi vegnì quiet enturn il project fotovoltaic a l’ur dal territori da skis Motta Naluns. Principi da mars 2024 ha la suprastanza da Scuol lura communitgà che la Dretgira administrativa dal chantun Grischun haja refusà cun sentenzia dals 12 da december 2023 il recurs cunter la radunanza cummunala areguard l’implant fotovoltaic. Quest recurs era vegnì inoltrà il settember 2023 d’ina squadra da sis persunas ch'aveva crititgà l’andament durant la radunanza da predeliberaziun la fin d’avust 2023. Tanter auter avessan ils recurrents gugent giavischà da pudair far ponderaziuns avant enstagl da stuair decider be a l’improvista davart d’in contract dad uschè ina gronda impurtanza. «A la fin n'ha il recurs betg gì success davant dretgira ed ils recurrents na tiran quel n'era betg vinavant en la proxima instanza. Quai ha natiralmain fatg plaschair», di Chasper Alexander Felix, parsura da la societad simpla Scuol Solar envers la FMR. Ensemen cun ils partenaris è el per il mument vi dad optimar il project definitiv, che avess d’avair in di ina prestaziun da 34 MWp, cun ina producziun da var 48 uras gigawatt l’onn sin ina surfatscha da bundant 57 hectaras.
Respunder a diversas posiziuns
«Fin ussa avain nus survegnì las emprimas posiziuns dals uffizi pertutgads e da societads d’ambients areguard la dumonda da fabrica. Per il mument essan nus vi da respunder las remartgas ed ils giavischs», declera Chasper Alexander Felix. El agiunta ch'igl haja dà inscunters cun ils acturs involvads per pudair concretisar las respostas a lur commentars – ed uschia evitar in «pingpong da respostas vi e nà memia ditg». Scuol Solar fa quint d’inoltrar tut ils documents e las respostas al principi da matg 2024.
Quest process haja a la fin era tratg en lunga l’andament en connex cun la dumonda da fabrica. Atgnamain era previs da survegnir quella per questa primavaira. Entant fa Scuol Solar quint cha la decisiun è sin maisa questa stad – u il zercladur avant las vacanzas da la regenza, u lura durant l’avust.
Dumondas da rendabilitad
Parallel è Scuol Solar era vi dad optimar il projet areguard la rentabilitad. I sa tracta dad optimaziuns relevantas tecnicas, logisticas, constructivas e d’extensiun cun la finamira da sbassar ils custs d’investiziun specific per MWp. Tenor il parsura èn ins tanter auter era vi da l’approfundir ils scleriments da la moda da finanziaziun. «I va era per scleriments davart la vendita da la forza e quai surtut per tge pretsch. Sin basa da quels resultats pon ins a la fin far la decisiun sch'ins vul realisar il project u betg», di Chasper Alexander Felix ed agiunta: «Ma sco emprim avain da survegnir il permiss da fabrica.»
Sche tut va tenor plan duai l'implant solar producir forza electrica per radund 12'000 chasadas a partir dal 2029.