Albert Rösti - Solarexpress è sa transfurmà en in regio

I para ch'il Solarexpress haja pers in zic ses schlantsch e saja vegnì franà in pau. Quatter dals 13 projects ch'ins ha vulì realisar en il Grischun ha la populaziun tramess quasi giu per il Rain.

Tuttina vesa il cusseglier federal e minister d'energia Albert Rösti il Solarexpress en il Grischun sco success e resta da buna speranza, ch'ins possia cun implants solars, rodas da vent e las ovras idraulicas producir avunda energia en Svizra ch'ins n'haja betg pli ina mancanza d'energia. Schegea che tscherts projects da l'«express» sajan per part vegnids franads in zic, possian quels forsa tuttina anc vegnir.

L'ultim project che ha survegnì in chanaster en il Grischun è stà il project Solar Nandro en Surses. In dals arguments principals da las adversarias e dals adversaris è stà, che l'indriz solar saja memia grond. Tenor Albert Rösti stoppian ils indriz simplamain s'integrar bain en la cuntrada. L'argument da las adversarias e dals adversaris ch'ils implants solars autalpins destrueschian la bella cuntrada en las muntognas grischunas per producir electricitad per quels da la Bassa, na lascha el betg valair.

En la Bassa vegnia gia producì ina massa energia solara. Sch'i giaja per la mancanza d'electricitad d'enviern, lura stoppian ins ir sur il cunfin da la tschajera per pudair producir energia solara.

Auters crititgeschan ch'il temp saja planisà memia stgars, uschia ch'ins na possia betg planisar endretg e surtut il temp per discussiuns profundas manchia. Il minister d'energia Albert Rösti di ch'ins haja lantschà il Solarexpress en in mument en il qual ch'ins aveva quintà cun in'eventuala mancanza d'energia. Oz sajan ins in zic or da quella situaziun, dentant betg dal tuttafatg. El na possia betg dir ch'ins prolungheschia lura simplamain il termin per il Solarexpress.